Kapital Bank BirKart-ın Feysbuk səhifəsində yeni yarışmaya start verir.

TED.az xəbər verir ki, 10-28 dekabr tarixlərində keçiriləcək müsabiqə insan tərəfindən deyil, “Aican” botu tərəfindən aparılacaq.

Yarışmaya qatılmaq üçün qeyd olunan tarix aralığında BirKart-ın Feysbuk səhifəsinin Messenger-ində "Yarışa başla" yazmaq kifayətdir. Müsabiqənin şərtlərinə görə bot vasitəsilə müştərilərə növbə ilə 10 sual veriləcək, 8 və daha çox sualı düzgün cavablandıran müştərilər qalib olmaq şansı əldə edirlər.

10 qalib 29 dekabr 2019-cu il tarixində BirKart-ın Feysbuk səhifəsində canlı yayımda təsadüf üsulu ilə seçiləcək. Onlardan 1 nəfər Etihad Airways tərəfindən Əbu-Dabi şəhərinə 2 nəfərlik bilet (gediş-dönüş) və BirKart Miles Debet plastik kartı, digər 9 nəfər isə BirKart Miles Debet plastik kartı hədiyyə qazanacaqlar.

Qeyd edək ki, “Aican” Messenger-botu 24 saat ərzində müştərilərin suallarını cavablandırmaqla yanaşı, BirKart məhsulu barədə ətraflı məlumat verir, müştərilərin verdikləri cavablar əsasında onları yönləndirir, sifarişləri onlayn qaydada avtomatik həyata keçirir, həmçinin müştəriyə yaxın filial və ya bankomatın ünvanını göstərir.