Məlum olduğu kimi İran Amerika Birləşmiş Ştatlarının İraqda yerləşən hərbi bazalarına raket zərbələri endirdi. 22 raketdən 2-si istisna olmaqla qalanları mənzilə çatdı. Mənzilə çatmayan raketlər də özü sıradan çıxdı. Yəni ABŞ-ın hava hücumundan müdafiə sisteminin müdaxiləsi olmadan. Bu məqamda ortaya belə sual çıxır: ABŞ-ın bütün dünyada məşhur olan "Patriot" hava hücumlarından müdafiə sistemi İran raketlərinə nə üçün cavab verə bilmədi?

Bəzi analitiklərin fikrincə, Pentaqon İranla mövcud gərginliyi azaltmaq üçün raketlərə göz yumub. Rəsmi Tehran hücumlar nəticəsində 80 ABŞ hərbçisinin öldüyünü bildirsə də, CNN telekanalının ordudakı mənbələri raketlər atılan zaman bazaların boşaldıldığını, hərbçilərin sığınacaqlarda olduğunu bildirir. Rəsmi Vaşinqtondan da hansısa itkinin olduğu qəbul edilməyib.

Bununla belə, bir reallıq var: raketlər atıldı və ABŞ bazaları partladıldı. "Patriot" hava hücumlarından müdafiə sisteminin işə düşməməsi yaxud da işə salınmaması bir neçə səbəblə əlaqələndirilir.

TED.az olaraq ABŞ-ın hava hücumlarından müdafiə sistemi "Patriot"un texniki parametrlərini və imkanlarını Sizə təqdim edirik:

"Patriot" (hərbi indeks - MIM-104) ABŞ-ın istehsal etdiyi hava hücumundan müdafiə sistemidir. Bu kompleks 1963-cü ildə “Nike Hercules” və “Hok” havada müdafiə komplekslərini əvəz etmək üçün yaradıldı.

“Patriot” PAC-3 zenit raket kompleksi 1997-ci ildə sınaqdan keçirilərək 2001-ci ildə silahlanmaya qəbul edilib.

Zenit raket Kompleksinin maksimal hədəf sürəti saniədə 1600 metrdir. Ballistik hədəflərin vurulma hündürlüyü 15 km-ə qədərdir.

“Patriot” Zenit Raket Kompleksinə daxildir:

- nəzarət nöqtəsi (batareyaya nəzarət) AN / MSQ-104;

- çoxfunksiyalı stansiya (radar) AN/MPQ-65;

- 8 ədəd işə salma qurğuları (PU) M901-ə qədər;

- enerji təchizatı mənbələri AN/MJQ-20;

- kompleksin rabitə vasitələri;

- radiorele stansiyaları AN/MCR-137;

- antenlər (maksimum hündürlüyü 30,5 metr);

- köməkçi avadanlıq;

- kompleksin daşınması və enerji mənbəyi maşınları (kranlı M819 traktor və 4-cü TPK ilə M269A1 yarımqoşqusu);

- kiçikölçülü ehtiyat hissələrin daşınması üçün maşınlar;

- böyükölçülü ehtiyat hissələri üçün xüsusi kran və yarımqoşqulu M819 traktoru;

- taktiki və radio-texniki kamuflyaj vasitələri

“Patriot”un konstruksiyası:

“MİM-104” raketini hədəfə yönləndirilməsi "raket vasitəsilə izləmə" metodundan istifadə edərək yerdən həyata keçirilir. Uçan raket hədəfdən əks olunan yerüstü radar siqnalını alır və birtərəfli rabitə kanalı ilə posta ötürür. Beləliklə, raket sistemi 2 qəbul stansiyasında siqnal ötürür: raket qəbuledicisi və radar qəbuledicisi. Daha sonra raketlərdən və yerdəki radarlardan alınan məlumatlar nəzarət kompüteri vasitəsilə müqayisə edilir və raketi trayektoriyaya düzəlişlər edərək hədəfə doğru istiqamətləndirir.