Azərbaycan Milli Elmlər Akademiyası Mərkəzi Elmi Kitabxanasının (MEK) Kitabxana-xidməti şöbəsi Fondların mühafizəsi bölməsinin əməkdaşı Fatma Fərəcova dissertasiyaların elektron kataloqa salınması prosesini icra edir.

Bu barədə TED.az-a MEK-dən məlumat verilib.

Bildirilib ki, dissertasiyaların elektron kataloqunu yaratmaq günün vacib məsələsi kimi daim diqqət mərkəzindədir. Artıq 1368 nüsxə dissertasiya elektron kataloqa işlənib. Bunlardan 188 nüsxəsi MRY bazasına daxil edilib.

Qeyd edək ki, Mərkəzi Elmi Kitabxanasında 1949-cu ildən bu günə qədər Ali Attestasiya Komissiyası tərəfindən təsdiq olunmuş dissertasiyalar mühafizə olunur. Burada elmin müxtəlif sahələrində çalışan bir çox görkəmli alim və mütəfəkkirlərin dissertasiyaları qorunur. Məsələn, Zamanov A. “Sabirin müasirləri” (1965), Babayev A. “Formı kaliya v osnovnıx tipax poçv Kuba-Xaçmazsskoy zonı Azerbaydjanskoy SSR” (1964), Qasımzadə F. “Füzulinin dünyagörüşü” (1965), Köçərli F. “Azərbaycanda inqilabi demokratik fikir və Nəriman Nərimanov” (1966), Beqdeli Q. “Nizaminin “Xosrov və Şirin” poeması və bu mövzunun Şərq ədəbiyyatında işlənməsi” (1967) və s. qiymətli dissertasiyalar oxucuların daim maraq dairəsindədir.

Hazırda kitabxananın fondunda 6470 nüsxə dissertasiya və 51558 nüsxə (19770 nüsxə Azərbaycan dilində, 31788 nüsxə rus dilində) avtoreferat mövcuddur. Bu rəqəmlər hər gün dəyişir.

Dissertasiyalar bu vaxta qədər dillərə ayrılmayıb. 2019-cu ildə dissertasiyalar dillərə ayrılıb. 3166 nüsxə Azərbaycan dilində, 3298 nüsxə rus dilində və 6 nüsxə xarici dildə dissertasiya kitabxana qaydası ilə yenidən işlənərək rəflərdə yerləşdirilib.