“Bu, Tripoli yaxınlığında Həftərin qüvvələri tərəfindən vurulan ikinci TB2 Bayraktar pilotsuz uçuş aparatıdır. Deyilənlərə və broşür informasiyalarına inansaq üstün texniki-taktiki xüsusiyyətləri var. Deyilənə görə, havada 24 saatdan çox qalır (digər şirkətin PUA-ları kimi broşür məlumatı da ola bilər. Reallıq nədir bilmirəm). Azərbaycana da satmaq istəyirdilər”.

TED.az xəbər verir ki, bu sözləri hərbi ekspert Rəşad Süleymanov Feysbuk səhifəsində yazıb.

Ekspert PUA-nın üstün cəhətlərindən danışıb: “Kəşfiyyat əməliyyatlarından əlavə PUA idarə olunan ağıllı sursatlar da daşıyır. Türk Ordusunun bir sıra əməliyyatlarında istifadə edilib. Ötən il ilk partiyası Ukraynaya satılıb. Türkiyənin hərbi yardımları çərçivəsində bir neçə ədəd Liviya Milli Hökumətinə verilib”.

Rəşad Süleymanovun fikirincə, üstün cəhətlərinə baxmayaraq, Bayraktar xarici əməliyyatlarda zəifdir: “Xarici əməliyyatlarda TB2-nin "ammaları" üzə çıxmağa başlayıb. Radarı, radioelektron mübarizə və hava hücumundan müdafiə sistemləri olmayan terror təşkilatları ilə, yaxud Afrikanın köhnə silahlara sahib ölkələrində bu PUA ideal sayıla bilər. Lakin görünən odur ki, Hava Hücumlarından Müdafiə (HHM) və Radioelektron Mübarizə (REM) sistemləri olan ordularla döyüşlərdə bu PUA yalnız ona verilən pulun zibilliyə atılmasından başqa bir şey deyil. Gündə birini vurub salırlar”.

“Hətta Ukrayna hərbçilərindən duyduğum qədər Şərqdəki münaqişə rayonlarında separatçılar ruslardan aldıqları sistemlərlə TB2-nin uçmasına maneələr qoyurlar”, – deyə ekspert əlavə edib.