11-13 fevral tarixlərində İSEF – Beynəlxalq Elm və Mühəndislik Sərgisi çərçivəsində keçirilən “Sabahın alimləri” IX Respublika müsabiqəsinin qalibləri artıq məlumdur.

TED.az məlumat verir ki, müsabiqədə riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri üzrə şagirdlər iştirak ediblər. Ümumilikdə 370 layihədən 187-si final mərhələsinə buraxılıb.

Bakı Dövlət Universiteti nəzdində “Gənc istedadlar” liseyinin X sinif şagirdləri İsazadə Məhəmməd Ramiz oğlu və Qasımov Kənan Seynur oğlu “Sabahın alimləri” IX Respublika müsabiqəsində təqdim etdikləri “Azeri Dactyl Alphabet” tətbiqi ilə birinci yerə layiq görülüblər. Bu layihə AMEA İnformasiya Texnologiyaları İnstitutunun lobarantı Yusif İmamverdiyevin rəhbərliyi ilə ərsəyə gəlib.  

Dünyada 34 milyonu uşaq olmaqla 466 milyon eşitmə, 500 milyon danışma qüsurlu insanların olduğunu, Azərbaycanda isə bu rəqəmin 310000-i əhatə etdiyini bildirən iştirakçıların fikrincə, “Azeri Dactyl Alphabet” adlı tətbiq inklüziv təhsilin inkişafına təkan verəcək. Bu proqram 3 hissədən ibarət olmaqla həm Android, həm də İOS əməliyyat sistemlərini dəstəkləyir. Birinci hissə “Əlifba” bölməsidir.

Bu bölmədə Azərbaycan Daktil əl əlifbasının hərfləri verilib. İkinci hissə “İfadələr” bölməsindən ibarətdir. İfadələr bölməsində jest dilində olan bütün ifadələr yer alıb. Üçüncü hissədə isə ən son texnologiyalardan olan süni intellektdən istifadə olunub. Bu hissədə yazılan xüsusi proqram vasitəsilə danışma və eşitmə qüsurlu şəxslər fikrini istənilən insana çatdıra biləcək.