Müharibə şəraitində olan ölkəmiz virtual aləmdə də tez-tez hücumlara məruz qalır. Kiberhücumlar daha çox sayt və informasiya agentliklərinin Dağlıq Qarabağla bağlı dərc etdiyi xəbərlərlə bağlı olur.

Sayt və informasiya agentlikləri kibertəhlükəsizliyini necə təmin etməlidir?

“İctimaiyyətin elmi istiqamətdə fəaliyyət göstərən resurslarının qorunması ilə cert.az saytı məşğul olur. Digər sahələrin qorunması ilə məhz Elektron Təhlükəsizlik Xidmətinin saytı, yəni millicert.az saytı məşğul olur. Bu, Nəqliyyat, Rabitə və Yüksək Texnologiyalar Nazirliyinin nəzdində fəaliyyət göstərən resursdur”.

Bunu TED.az-a II Beynəlxalq Kibertəhlükəsizlik həftəsində Nəqliyyat, Rabitə və Yüksək Texnologiyalar Nazirliyinin şöbə müdiri Rəşad Əzizov bildirib.

Rəşad Əzizov qeyd edib ki, Elektron Təhlükəsizlik Xidməti ilə sıx əməkdaşlıq etmək lazımdır: “Əsas məsələ budur ki, saytlar problem yarandıqdan sonra yox, öncədən təhlükəsizliklərini təmin etsinlər. Hansısa resurs hücum altında qalıbsa, bu o deməkdir ki, dərhal digərləri də təhlükə altındadırlar. Burda birinci məqam həm informasiya mübadiləsinin aparılması, həm də bunun işıqlandırılması ilə bağlıdır. Çünki əsas məsələ məlumatlı olmaqdır. Məlumatlısansa, deməli, silahlanmısan. Bu prosesə belə yanaşmaq lazımdır”.

Rəşad Əzizov qeyd edib ki, infastruktur var və hər gün belə hücumlar baş verir: “Bəzi hallarda hücum o qədər güclü olur ki, ictimaiyyət bu barədə məlumatlı olur. Amma ictimaiyyətə heç çatmayan gündəlik insidentlər də baş verir. Kiberhücumların çoxu maliyyə xarakteri daşısa belə, biz çox vaxt onun müharibənin tərkib hissəsi olduğunu bilmirik. Çünki bizim bank sektorumuzda kritik infastrukturumuz var. Ona görə də bu kimi prosseslərə hazır olmaq üçün öncəliklə informasiya agentlikləri kibertəhlükəsizliyin nə olduğunu dərk etməlidir. Əsas məqsədimiz kibersənaye və ekosistemi formalaşdırmaqdır. Məhz bu kimi kibertəhlükəsizlik həftəsinin məqsədi ondan ibarətdir ki, bir həftə ərzində bütün ictimaiyyət ona diqqət yetirsin”.

Nuranə DAXİLQIZI