Səsli mesajlar bəzən bizə rahatlıq verir, xüsusilə mətn uzun olanda və ya yazmaq imkanı olmayanda. Bəzən isə kiminsə monoloquna qulaq asmaq bizi sadəcə qəzəbləndirir. Bir sözlə səsli mesajlara münasibət birmənalı deyil.

TED.az olaraq səsli mesajları kimə, hansı şərtlərlə, necə, nə vaxt göndərməyin daha məqsədəuyğun olub olmadığını mütəxəssislərin köməyi ilə araşdırdıq.

Səsli mesaja sevgimiz nədən yaranıb?

Psixologiya üzrə fəlsəfə doktoru Ruhəngiz Qarayeva bildirdi ki: “Səsli mesajlarda səmimiyyət var, insanın emosional vəziyyətini duymaq imkanı verir. Biz qarşı tərəfin əhval ruhiyyəsini səs tonundan sezə bilirik, hansı ki, bunu heç bir smaliklə hiss etdirmək mümkün deyil. Səsli mesaja sevgimiz də məhz bundan yaranıb. Amma, təəssüf ki, səsli mesajın üstünlükləri elə bununla bitir. Onu dinləmək üçün həmişə imkan olmaya bilər. Buna görə də  səs göndərməzdən əvvəl qarşı tərəfin bu mesajı dinləmək üçün uyğun olub olmadığını öyrənmək lazımdır. Həmsöhbətiniz işgüzar görüşdə, ofisdə, metroda ola bilər, musiqiyə qulaq asa bilər, niyə öz işindən ayrılmalıdır?”

Bax buna görə yazdığımızı dəfələrlə pozub yenidən yazırıq...

Psixoloq Ruhəngiz Qayarevaya görə, daha bir fərq ondan ibarətdir ki, səs göndərərkən mövzunu uzadıb, eyni anda bir necə informasiya verə bilərik. Bu da həm gec qavranılır, həm də əksərən lazımsız məlumat olur. İnsanlar danışarkən özlərini bəyəndikləri üçün uzun danışırlar, yazarkən isə özünüqiymətləndirmə düşür və nəticədə məzmun qısalır. Yazdığımızı dəfələrlə pozub yenidən yazma səbəbimiz də məhz bununla bağlıdır.

Korporativ mədəniyyətə gəldikdə isə ...

Birincisi, həmişə monoloqun başqaları tərəfindən necə qəbul ediləcəyini təsəvvür etmək lazımdır. Əks halda mesaj sahibi gülünc vəziyyətdə qala bilər.

İkincisi, məlumatın vacibliyi qiymətləndirilməlidir - yəni vəziyyət çox kritik olduğundan, yazma imkanınız olmayıb.

Üçünçüsü, audio yazı maksimum qısa olmalıdır.

Dördüncüsü, unutmayın ki, səs ən güclü qıcıqlandırıcıdır və sizin səs tonunuz kiminsə xoşuna gəlməyib, onda stress yarada bilər.

Müdirinizə səsli mesaj göndərmisinizsə, işlər qəlizdi

Psixoloq Aygün Ağabalayevanın fikrincə, səsli mesaj  göndərməzdən öncə həmsöhbət qiymətləndirilməlidir. Əgər o sizdən yaşca böyükdürsə, bu halda səs göndərmək etik deyil.  Qaydaya görə yaşca və statusca böyük olan insanlar ilk olaraq səs göndərə bilərlər. Yalnız bundan sonra siz səsli mesajla ünsiyyət qura bilərsiniz. Amma, yenə də bu o demək deyil ki, rəhbərliyin səsli mesajına mütləq səslə cavab verməliyik. İmkan dairəsində cavabı yazılı mesaj formasında göndərmək daha məqsədəuyğundur.

Əlbəttə ki, korporativ fəaliyyətdə səsli mesaj nə qədər düzgün hesab edilməsə də, bəzən buna zərurət yaranır. Belə olan təqdirdə səsli mesaj göndərən mütləq üzr istəyərək, niyə audio mesaj göndərməyə məcbur qaldığını bildirməlidir.

Mütəxəssislər məsələnin ciddiliyini nəzərə alıb düşünür ki, gələcəkdə işə qəbul olarkən “səsli mesajlar yalnız fövqəladə hallarda göndərilə bilər” kimi şərtllərə rastlaşa bilərik.