AZ

Kaspersky-dən məsafədən işlə bağlı xəbərdarlıq 

frilanser
19.03.2020 13:45

"Trafik müdaxiləsinin qarşısını almaq üçün korporativ şəbəkə ilə əlaqələrin hamısı VPN tunellərindən istifadə edərək şifrələnməlidir. Ehtiyac olduğu halda, ikisəviyyəli identifikasiya quraşdırmaq lazımdır".

 

Bu sözləri TED.az-a açıqlamasında "Kaspersky" şirkətinin Azərbaycandakı rəsmi nümayəndəsi Müşviq Məmmədov deyib.

 

O, yaranmış vəziyyəti şərh edərək təşkilatlara məsafədən iş fəaliyyət zamanı yoluxma risklərindən qorunmaq üçün faydalı məsləhətlər verib: "İnsanların evdən işləməsi ilə ofislərlə məsafədən əlaqələrin sayı artacaq, ofis infrastrukturuna qoşulmaq üçün şəxsi cihazlardan istifadə ediləcək. Bu, müəyyən risklər yaradacaq. Təşkilatların, xüsusilə də əvvəllər bu iş üslubundan istifadə etməyən şirkətlərin təhlükəsizlik xidmətləri əlavə tədbirlər görməlidirlər. Bu vəziyyətdə prioritet vəzifələr etibarlı əlaqəni təmin etmək, cihazın etibarlılığından əmin olmaq, məsafədən iş zamanı kommunikasiya qaydaları haqqında razılığa gəlmək olmalıdır". 

 

Şirkət rəsmisi vurğulayıb ki, əgər işçi korporativ cihazı evə aparırsa, çox güman ki, üzərindəki qoruyucu həllər artıq işləyir: "Ev kompüterindən istifadə edərkən, potensial yoluxmuş cihazları ona qoşmaq riskini aradan qaldırmaq üçün bütün lazımi təhlükəsizlik proqram təminatlarının quraşdırıldığından əmin olmaq vacibdir. İş qaydaları haqqında razılaşmaq da vacibdir. Danışıqların, qarşılıqlı zənglərin təhlükəsiz şəraitdə aparılması və s. buna misaldır. Həmkarlara kiber təhlükəsizliyin əsas qaydalarını xatırlatmaq da lazımdır. Yəni yad adamların məktublarındakı linklərə daxil olmamalı, etibarlı şifrələrdən istifadə etməlidirlər".

Texnologiya bölməsindən digər xəbərlər

Daha çox