Martın 25-də G7 ölkələrinin xarici işlər nazirləri koronavirus pandemiyası ilə əlaqədar ilk dəfə videokonfrans formatında danışıqlar aparacaqlar. 

TED.az TASS-a istinadən xəbər verir ki, bu barədə Yaponiyanın xarici işlər naziri Toşimitsu Motegi bu gün keçirdiyi mətbuat konfransında məlumat verib.

"Sabah Yaponiya vaxtı ilə 20:00-da (Bakı vaxtı ilə 15:00) G7 xarici işlər nazirlərinin danışıqları başlayacaq. Danışıqlar ilk dəfə videoformatda keçiriləcək. Belə çətin vəziyyətdə, dünyada koronavirus yayıldığı zamanda fiziki olaraq bir araya gələ bilmərik", - nazir açıqlamasında qeyd edib.

O əlavə edib ki, danışıqlarda koronavirus pandemiyası ilə yanaşı, Şimali Koreya, İran və Yaxın Şərqdə də daxil olmaqla aktual beynəlxalq problemlər müzakirə ediləcək".

Qeyd edək ki, keçən həftə Amerika Birləşmiş Ştatları (ABŞ) prezidenti Donald Trump koronavirus riskinə görə, Kamp Daviddəki iqamətgahında G-7 liderlərinin iyun görüşünü ləğv edəcəyini və bunun əvəzinə videokonfrans keçirəcəyini deyib. ABŞ bu il Böyük Yeddiliyə sədrlik edir.