AZ

icaze.e-gov.az portalından istifadədə çətinliklər var - SƏBƏB

85
03.04.2020 13:22

Məlum olduğu kimi, "Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemi”nin 2 fərqli modulu yaradılıb. Bu modullardan biri - icaze.e-gov.az saytı bu gün saat 10:00-dan etibarən aktivləşdirilib. 

 

Vətəndaşlara Xidmət və Sosial İnnovasiyalar Agentliyinin direktor müavini Ceyhun Salmanov bildirib ki, 2 saat ərzində 3500-dən çox sirkətin   6500-ə qədər əməkdaşının qeydiyyatı artıq sistemdə aparılıb. 

 

TED.az xəbər verir ki, sistemdə yaranan problemlərlə də bağlı məsələyə aydınlıq gətirən sədr müavini bunları bildirib: “Qeyd edim ki, bu sayt yalnız dövlət qurumları, habelə özəl təşkilatlar üçün nəzərdə tutulur. Düzdür, hazırda saytda yüklənmə olduğunu bilirik. Bunun səbəbini daha çox sadə vətəndaşların icazə almaq üçün bu sayta müraciətlər etmələrində görürük. İnanırıq ki, qadağaların tətbiq edildiyi günə, ayın 5-nə qədər bütün problemlər aradan qaldırılacaq. Sayt hazırda işləkdir, sadəcə yüklənmə var. Vətəndaşların fərdi qaydada evdən çıxmaları isə yalnız müvafiq icazə kodunun SMS vasitəsilə 8103 nömrəsinə göndərilməsi ilə təmin ediləcək. Bu sistem 5 aprel tarixindən etibarən işə düşəcək.

 

"İcazələrin Alınması və Monitorinqi Sistemi"ndə (icaze.e-gov.az) isə yüklənmə hal-hazırda da davam edir. Sistemdən qeydiyyatdan keçmək istəyən şirkət nümayəndələri bir əməkdaşlarını qeydiyyatdan keçirmək üçün təxminən 30 dəqiqə vaxtın sərf edildiyini qeyd edirlər. Həmçinin icazəni alıb və ya ala bilmədikləri barədə də məlumatı görə bilmirlər.

 

İKT üzrə jurnalis-ekspert Rəşad Cəfərov sistemin fəaliyyətinin təşkili üçün əvvəlki nümunələrdən dərs almağımızı vacib sayır: “Bu tip sistemlərin fəaliyyəti ilə bağlı artıq bir neçə dəfə ciddi problemlərlə rastlaşmışıq - MİDA-nın sosial evlərlə bağlı, eləcə də kirayə evlərlə bağlı olan sistemlər. Hər dəfə də müraciət sayının çox olması ilə əlaqədar yüklənmələr yaranıb və sistem çöküb. İnanmaq istərdim ki, bu dəfə vətəndaşlarımız belə bir hadisə ilə qarşılaşmazlar. Əvvəlki hadisələrdən dərs götürmüş olarıq. İndiki vəziyyətdə nə vətəndaşlara, nə də bu sistemin fəaliyyətini təşkil edən qurumlara bu, lazım deyil. Sistem bir neçə qurumun məlumatları əsasında inteqrasiya şəraitində işləyir. Sistemə inteqrasiya olan qurumlar da məsələni diqqətdə saxlamalıdırlar.”

 

 

Zeynəb ƏKBƏR

e-Azərbaycan bölməsindən digər xəbərlər

Daha çox