TED.az olaraq ingilis dilini öyrənmək üçün nəzərdə tutulan 5 tətbiqi sizə təqdim edirik:

 

 

 1.Duolingo 

 

 

 

 

İngilis dilini öyrənmək üçün nəzərdə tutulan  bəlkə də ən populyar mobil tətbiq Duolingo-dur. Duolingo Play Market-də 7 milyondan çox rəyə və 4.7 ulduzlu reytinqə sahibdir. Bu pulsuz tətbiq interaktiv oyunlar vasitəsilə yeni sözlərin və qrammatikanın öyrənilməsinə kömək edir. Dərslər kateqoriyaya görə ayrılır. 

 

 

İngilis, ispan, alman, fransız dillərini öyrənmək üçün tətbiqə gündə 15 dəqiqə vaxt ayırmağınız kifayət olacaq.

 

 

Duolingo bir çox məktəb və universitetlərdə istifadə olunur: müəllimlər proqramı İngilis dilində əlavə dərs olaraq tələbələrinə məsləhət görürlər. Tətbiq həm iOS, həm də Android istifadəçiləri üçün əlçatandır.

 

 

 

2. Lingualeo 

 

 

 

 

Lingualeo İngilis dilini öyrənməyə kömək edəcək pulsuz tətbiqdir. Proqram artıq 18 milyondan çox Android istifadəçisi tərəfindən quraşdırılıb. Burada müəyyən bacarıqların inkişafına yönəlmiş müxtəlif məşğələləri tapacaqsınız: söz ehtiyatınızı genişləndirəcəksiniz, xarici sözləri düzgün tələffüz etməyi, oxumağı və yazmağı bacaracaqsınız. Tətbiq oyun alqoritmi üzərində qurulub, məhz bunun üçün darıxdırıcı ola bilməz. Lingualeo həm uşaqlar üçün, həm də böyüklər üçün nəzərdə tutulub. Proqramı Google Play-də və App Store-da yükləmək mümkündür.

 

 

3. Memrise

 

 

 

 

 

Memrise Google Play Store tərəfindən 2017-ci ilin ən yaxşı tətbiqləri sırasında yer alıb. Bu tətbiq danışıq dilini öyrənməkdə kömək edir. Onlarla fərqli dili öyrənə biləcəyiniz proqramın təməl özəlliyi heç bir dilin qrammatik qaydaları haqqında məlumat verməməsidir. Memrise-ın ingilis kursu 7 ayrı hissədən ibarətdir. 7 bölümü uğurla başa vursanız, B1/B2 arasında bilik səviyyəsinə sahib ola biləcəksiniz. Tətbiqi pulsuz olaraq Google Play Store və App Store üzərindən yükləyə bilərsiniz.

 

 

4. Wlingua 

 

 

 

 

 

Wlingua tətbiqi ən kiçik tələbələr üçün nəzərdə tutulub. Tətbiqdə müxtəlif mövzulardan ibarət  600 dərs var. 

 

 

Təlimə başlamazdan əvvəl proqram bilik səviyyənizi müəyyənləşdirmək üçün qısa imtahan keçirməyi təklif edir, daha sonra sizin üçün fərdi məşq planını hazırlayır: oxuma, qrammatika məşqləri, lüğət.

 

Tətbiqə bir neçə cihazdan daxil olmaq üçün adınıza hesab açılacaq. Proqramın əsas versiyası pulsuzdur, lakin əlavə dərslərdən yararlanmaq istəyirsinizsə, Wlingua-nın pullu variantını həm Play Store, həm də App Store üzərindən endirmək mümkündür.

 

 

5. BBC Learning English 

 

 

 

 

BBC Learning English tətbiq deyil, veb-saytdır. Yüksək standartlara uyğun olan bu sayt daha çox təcrübəyə malik insanlar üçün nəzərdə tutulub. Veb-saytda BBC-nin TV və radio yayımları vasitəsi ilə orta, həmçinin yüksək səviyyədə  ingilis dili dərsləri keçirilir.