“Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemi” vasitəsi ilə aprelin 5-dən vətəndaşların sorğuları cavablandırılmağa başlanılıb. Bunun üçün 8103 əlaqə nömrəsinə müraciətə uyğun olaraq 1,2,3 rəqəmlərindən birini və şəxsiyyət vəsiqəsinin seriya nömrəsini yazmaq tələb olunur. Bəs balansda kontur yoxdursa, SMS göndərmək mümkündür?

TED.az xəbər verir ki, Vətəndaşlara Xidmət və Sosial İnnovasiyalar Agentliyindən bu suala cavab verilib.

Bildirilib ki, 8103 SMS icazə sisteminə göndərilən müraciətlər üçün vətəndaşlardan ödəniş tələb olunmur.

Qeyd edək ki, "1" rəqəmi təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini tərk etmək üçün nəzərdə tutulub. "2" rəqəmi ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar yaşayış yerini tərk etmək üçün, "3" isə yaxın qohumunun dəfnində iştirakla əlaqədar icazə üçün nəzərdə tutulub.