“Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemi” vasitəsi ilə aprelin 5-dən vətəndaşların sorğuları cavablandırılmağa başlanılıb. Bunun üçün 8103 əlaqə nömrəsinə müraciətə uyğun olaraq 1,2,3 rəqəmlərindən birini və şəxsiyyət vəsiqəsinin seriya nömrəsini yazmaq tələb olunur. Çoxları isə SMS göndərsə də, bir saat keçməsinə baxmayaraq,cavab gəlmədiyini iddia edirlər.

TED.az xəbər verir ki, Vətəndaşlara Xidmət və Sosial İnnovasiyalar Agentliyindən bu tip problemlə üzləşənlərə cavab verilib. Bildirilib ki, belə olan halda "ASAN xidmət"in 9108 çağrı xidməti ilə əlaqə saxlamaq tövsiyə edilir.

Qeyd edək ki, "1" rəqəmi təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini tərk etmək üçün nəzərdə tutulub. "2" rəqəmi ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar yaşayış yerini tərk etmək üçün, "3" isə yaxın qohumunun dəfnində iştirakla əlaqədar icazə üçün nəzərdə tutulub.