“Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemi” vasitəsi ilə aprelin 5-dən vətəndaşların sorğuları cavablandırılmağa başlanılıb. Bunun üçün 8103 əlaqə nömrəsinə müraciətə uyğun olaraq 1, 2, 3 rəqəmlərindən birini və şəxsiyyət vəsiqəsinin seriya nömrəsini yazmaq tələb olunur. "SMS yazdıqdan sonra avtomobil üçün də icazə alınmalıdırmı?" sualı isə çoxlarını düşündürür.

TED.az xəbər verir ki, Vətəndaşlara Xidmət və Sosial İnnovasiyalar Agentliyindən bu suala cavab verilib.

Bildirilib ki, bunun üçün icazə almağa ehtiyac yoxdur, müvafiq zəruri hala əsasən, icazə verilmiş şəxslərin qeyd olunan müddət ərzində şəxsi nəqliyyat vasitəsi və ya etibarnamə əsasında idarə etdiyi nəqliyyat vasitəsi ilə hərəkətinə icazə verilir.

Qeyd edək ki, "1" rəqəmi təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini tərk etmək üçün nəzərdə tutulub. "2" rəqəmi ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar yaşayış yerini tərk etmək üçün, "3" isə yaxın qohumunun dəfnində iştirakla əlaqədar icazə üçün nəzərdə tutulub.