“Xüsusi Karantin Rejiminin Tətbiqi Zamanı İcazələrin Alınması və Monitorinqi Sistemi” vasitəsi ilə 5 aprel 2020-ci il tarixindən vətəndaşların sorğuları cavablandırılmağa başlanılıb. Bunun üçün 8103 əlaqə nömrəsinə müraciətə uyğun olaraq 1, 2, 3 rəqəmlərindən birini və şəxsiyyət vəsiqəsinin seriya nömrəsini yazmaq tələb olunur. Çoxlarını isə bu sual maraqlandırır: Təsərrüfat sahəsi evə yaxındır, belə olduğu halda evdən çıxarkən SMS icazəyə ehtiyac varmı?

TED.az xəbər verir ki, Vətəndaşlara Xidmət və Sosial İnnovasiyalar Agentliyindən bu suala cavab verilib.

Bildirilib ki, bunun üçün SMS icazəyə ehtiyac yoxdur. Qeyd olunan məsələ ilə bağlı ətraflı məlumat əldə etmək üçün Kənd Təsərrüfatı Nazirliyinin "Çağrı mərkəzi" ilə əlaqə saxlamaq lazımdır - 1652.

Qeyd edək ki, "1" rəqəmi təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini tərk etmək üçün nəzərdə tutulub. "2" rəqəmi ərzaq və digər gündəlik tələbat mallarının, habelə dərman vasitələrinin alınması, bank və poçt xidmətlərindən istifadə edilməsi zərurəti ilə əlaqədar yaşayış yerini tərk etmək üçün, "3" isə yaxın qohumunun dəfnində iştirakla əlaqədar icazə üçün nəzərdə tutulub.