AZ

Bu abituriyentlər qəbul imtahanlarına buraxılmayacaq – RƏSMİ

7888
02.06.2020 16:22

Azərbaycanda orta təhsil alan əcnəbi vətəndaşlar arasında pandemiyadan öncə xaricə gedən, sərhədlər bağlandığı üçün ölkəyə qayıda bilməyənlər az deyil. IX-XI siniflərdə oxuyan belə şagirdləri narahat edən məqam isə iyun ayında buraxılış imtahanı vermələrinin zəruriliyidir.

 

Maraqlıdır, Azərbaycana gəlməkdə çətinlik çəkən bu şagirdlərin aqibəti necə olacaq? Dövlət İmtahan Mərkəzi onlayn yolla imtahanları kompensasiya edə bilərmi?

 

Mövzu ilə bağlı TED.az-a danışan təhsil eksperti Elçin Əfəndi bildirib ki, Azərbaycanda əcnəbi sektorlarda oxuyan xarici ölkə vətəndaşları Azərbaycan dilindən imtahan verməlidirlər: "Bunun üçün mütləq şəxsi kabinet açılmalıdır. Şəxsi kabinet üçün sonuncu tarix isə 5 iyundur. Pandemiya nəzərə alınaraq, DİM həmin şagirdlər üçün sentyabrda imtahan keçirəcək. Onlar üçün onlayn imtahan da təşkil etmək olar. Amma belə abituriyentlər say baxımından azlıq təşkil edir və onlayn forma istənilən halda qarışıqlıq yaradır".

 

DİM-in Mətbuatla iş və elektron kommunikasiya sektorunun müdiri Xanlar Xanlarzadə də həmin şəxslər üçün sentyabrda yenidən buraxılış imtahanları keçiriləcəyini vurğulayıb: "Belə şəxslər bu il ali və orta ixtisas təhsili müəssisələrinə qəbul olmaq üçün müsabiqədə iştirak edə bilməyəcəklər".

 

"İndi açılan şəxsi kabinetdəki məbləğ sentyabra kimi qüvvədə qalacaqmı?" sualına cavab olaraq isə DİM rəsmisi bildirib ki, şəxsi kabinet şəxsiyyət vəsiqəsinin məlumatları əsasında açılır və ömürlükdür. Hansısa məbləğ də batmır, istənilən halda şəxsi kabinetdə qalır.

 

Lamiyə SÜLEYMANLI

Elm bölməsindən digər xəbərlər

Daha çox