AZ

Karantinə görə ölkəyə qayıda bilməyən şagirdlər bu cür imtahan verəcəklər - RƏSMİ

imtahan
02.06.2020 20:51

Azərbaycanda orta təhsil alan əcnəbi vətəndaşlar arasında pandemiyadan öncə xaricə gedən, sərhədlər bağlandığı üçün ölkəyə qayıda bilməyənlər az deyil. IX-XI siniflərdə oxuyan belə şagirdləri narahat edən məqam isə iyun ayında buraxılış imtahanı vermələrinin zəruriliyidir.


Maraqlıdır, Azərbaycana gəlməkdə çətinlik çəkən bu şagirdlərin aqibəti necə olacaq. Dövlət İmtahan Mərkəzi onlayn yolla imtahanları kompensasiya edə bilər?


Mövzu ilə bağlı TED.az-a danışan təhsil eksperti Elçin Əfəndi bildirib ki, Azərbaycanda əcnəbi sektorlarda oxuyan xarici ölkə vətəndaşları Azərbaycan dilindən imtahan verməlidirlər: "Bunun üçün mütləq şəxsi kabinet açılmalıdır. Şəxsi kabinet üçün sonuncu tarix isə 5 iyundur. Pandemiya nəzərə alınaraq, Dövlət İmtahan Mərkəzi (DİM) həmin şagirdlər üçün sentyabrda imtahan keçirəcək. Onlar üçün onlayn imtahan da təşkil etmək olar. Amma belə abituriyentlər say baxımından azlıq təşkil edir və onlayn forma isənilən halda qarışıqlıq yaradır".


DİM-in Mətbuatla iş və elektron kommunikasiya sektorunun müdiri Xanlar Xanlarzadə də həmin şəxslər üçün sentyabrda yenidən buraxılış imtahanları keçiriləcəyini vurğulayıb: "Amma belə şəxslər bu il ali və orta ixtisas təhsili müəssisələrinə qəbul olmaq üçün müsabiqədə iştirak edə bilməyəcəklər".


"İndi açılan şəxsi kabinetdəki məbləğ sentyabracan qüvvədə qalacaqmı?" sualına cavab olaraq isə DİM rəsmisi bildirib ki, şəxsi kabinet şəxsiyyət vəsiqəsinin məlumatları əsasında açılır və ömürlükdür: "Hansısa məbləğ də batmır, istənilən halda şəxsi kabinetdə qalır".


Lamiyə SÜLEYMANLI

KORONAVİRUS bölməsindən digər xəbərlər

Daha çox