AZ

Beynəlxalq startap müsabiqəsində Azərbaycan final mərhələsinə yüksəldi

21.08.2019 18:35

HealWith mobil tətbiqi tam süni intellekt istifadə edərək bitkilərin xəstəliklərini tapır və sonra onun müalicəsi ilə bağlı istifadəçini məlumatlandırır

 

Ən böyük regional startap müsabiqəsi hesab edilən EuroAsian Startup Awards (EASA) müsabiqəsinin finalçıları məlum olub. Azərbaycanlı iştirakçılar Elviz İsmayılov, İsa Zeynal, Fuad Ağayev, Dəniz Əliyev, Rəşid Əliyev, Şahin Əbdürrəhimov, Orxan Əliyev, İlkin Haqverdiyev və Camal Ağayev öz startaplarını təqdim etməklə finala vəsiqə qazananlar sırasında yer alıb.

 

Finalçı Elviz İsmayılov müsabiqədə qalib seçilən HealWith startapı haqqında TED.az-a danışıb: HealWith mobil tətbiqi tam süni intellekt istifadə edərək bitkilərin xəstəliklərini tapır və sonra onun müalicəsi ilə bağlı istifadəçini məlumatlandırır. Bu sistem mobil qurğular üçün nəzərdə tutulmuş proqram təminatıdır. Proqram bu şəkildə işləyəcək: istifadəçilər xəstəliyə yoluxmuş bitkinin yarpağının və ya meyvənin şəklini çəkib sistemə yerləşdirəcəklər. Süni intellektə həmin xəstəliyin növü öyrədilibsə, yəni sistemə o xəstəlik yazılıbsa, şəkil əsasında proqram xəstəliyin növünü təyin edəcək. Eyni zamanda, proqram istifadəçiyə xəstəliyin müalicə üsulları haqqında da məlumat verəcək. Hal-hazırda 3 xəstəlik tam öyrədilib, proses davam etdirilir. Sistemə yeni xəstəliklər əlavə olunur”.

 

 

Sözügedən müsabiqəyə startapçılar mayın 20-dən iyulun 21-dək 19 kateqoriya üzrə onlayn platforma vasitəsilə layihələrini təqdim ediblər. Seçilmiş finalçılar sentyabr ayında keçiriləcək əsas finalda yer alaraq, noyabrın 30-da regional finalda iştirak etmək hüququ qazanacaqlar.

 

Müsabiqə namizədlərin startaplarının beynəlxalq səviyyəyə çıxması üçün önəmli addım hesab olunur

 

EuroAsian Startup Awards-a qoşulan startapçılar 3 mərhələ üzrə yarışırlar: milli, regional və qlobal. Bir mərhələdən digərinə ən yaxşı ekosistem oyunçuları seçilərək növbəti mərhələyə keçirlər. Müsabiqənin daha bir özəlliyi ondan ibarətdir ki, istənilən startapçı onlayn platforma vasitəsilə öz startapını təqdim edə bilər. EASA, 3 qitədə, 7 bölgədə təşkil edilən ən böyük startap yarışı olan Global Startup Awards-ın bir hissəsidir. Müsabiqə Şimal ölkələrini, Mərkəzi Avropanı, Cənub-Şərqi Asiyanı, Cənubi Afrikanı, Cənubi Asiya və Cənubi Avropanı əhatə edir.

 

Məlumat üçün bildirək ki, final mərhələsində azərbaycanlı startapçıların rəqibləri sırasında Türkiyə, Belarus, Gürcüstan, Moldova, Ermənistan, Rusiya Federasiyası və Ukraynadan olan iştirakçılar da olacaq.

 

Zeynəb ƏKBƏR

Startaplar bölməsindən digər xəbərlər

Daha çox