Dünyada hər dörd smartfon istifadəçisindən üçünə (smartfon istifadəçilərinin 72 faizinə) hər ay spam zənglər gəlir. Spamerlər daha çox cümə axşamı və cümə günləri saat 16:00-18:00 aralığında zəng edirlər.

TED.az xəbər veriri ki, bu barədə Kaspersky Lab şirkətinin məlumatında qeyd olunub.

Arzuolunmaz zənglər siyahısının ilk onluğuna kollektorlar və reklam zəngləri, riskli maliyyə əməliyyatları və investisiya təklifləri daxildir.

“Spam zənglər abonentləri bərk əsəbiləşdirir. Hesablamalarımıza görə, naməlum nömrələrdən gələn zənglərin spam olma ehtimalı 70 faizə bərabərdir. Buna görə də telefon zəngini cavablandırmadan kimin zəng etdiyini müəyyənləşdirən həllərə tələbat artır. Bu həllər sizə lazımsız danışıqlardan qaçmağa yardım edəcək", - deyə Kaspersky Lab şirkətinin sistem analitiki Dmitri Volqin bildirib.

Telefon spamından və fırıldaqçılıqdan qorunmaq üçün şirkət Kaspersky Who Calls həllini təklif edir. Proqram kimin zəng etdiyini dərhal öyrənməyə imkan verir. Əməliyyat sistemindən asılı olaraq həll elə zəng zamanı təşkilatın/nömrənin sahibinin adını və zəngin kateqoriyasını təyin edir. Məsələn, “kredit”, “çatdırılma xidməti” və s. Bununla belə, Kaspersky Who Calls həlli istifadəçinin mobil nömrəsini tələb etmir və onun şəxsi məlumatlarını indeksləşdirmir.