Əmlak Məsələləri Dövlət Komitəsində vətəndaş müraciətləri və qəbullar komitənin regional qurumlarına nəzarət birbaşa canlı bağlantı ilə də aparılacaq.

TED.az xəbər verir ki, komitə tərəfindən 23 avqust tarixində təqdimatı keçirilən yeni layihə vasitəsilə vətəndaşlarla birbaşa olaraq onlayn şəkildə qəbullar təşkil edilib və onları maraqlandıran bütün suallar canlı olaraq cavablandırılıb.

Tədbiri giriş sözü ilə açan Əmlak Məsələləri Dövlət Komitəsinin sədr müavini Rafiq Cəlilov bildirib ki, komitə innovativ üsullarla fəaliyyətini müasir formada təşkil edir. Sədr müavini qeyd edib ki, yeni layihənin tətbiqində məqsəd, vətəndaş sorğularının daha operativ cavablandırılması, məmnunluq səviyyəsinin yüksəldilməsi, o cümlədən idarəetmədə nəzarət tədbirlərinin genişləndirilməsi, fəaliyyətdə effektivliyin artırılmasıdır.

Təqdimat zamanı Lənkəran və Qəbələ ərazi dairələrindən olan vətəndaşların komitəyə gəlmədən virtual olaraq müraciətləri dinlənilib. Gələcəkdə vətəndaşların xüsusi proqram vasitəsilə birbaşa komitənin rəhbər işçilərinə bilavasitə müraciət etmələri təmin olunacaq.

Layihənin digər unikallığı Komitə ilə regional qurumların fəaliyyətlərinə canlı bağlanmaqla nəzarət etmək, virtual konfransları keçirmək, baş verən hadisələrə tez bir zamanda reaksiya verməkdir.

Məlumat üçün bildirək ki, virtual vətəndaş qəbullarının keçiriləcəyi yer və tarix, o cümlədən vətəndaşları qəbul edəcək şəxslərin siyahısı Komitənin rəsmi saytında  “Vətəndaşlar üçün” bölməsinin “Qəbul qrafiki” altbölməsində yerləşdiriləcək.