AZ

Bu sistem Azərbaycanda SOC 2 və SOC 3 rəylərini alan ilk və yeganə elektron platformadır

10.09.2019 17:04

Güzəştli mənzil elektron sisteminin təkmilləşdirilmə işləri davam etdirilir.

 

Azərbaycan Respublikasının Mənzil İnşaatı Dövlət Agentliyindən TED.az-a verilən məlumata əsasən, nüfuzlu beynəlxalq audit şirkəti Ernst & Young"(EY) Güzəştli mənzil sistemini kompleks audit yoxlamalarından keçirərək sistemdə aparılmış bütün əməliyyatları hərtərəfli təhlil edib və öz müsbət “SOC 3” rəyini təqdim edib.

 

Xatırladaq ki, elektron hökumət portalı üzərindən Güzəştli mənzil sistemi vasitəsilə 12 və 14 iyul 2019-cu il tarixlərində həyata keçirilmiş onlayn mənzil seçimi prosesi başa çatıb.

 

Azərbaycan Respublikasının Mənzil İnşaatı Dövlət Agentliyi tərəfindən istifadəyə verilmiş Güzəştli mənzil sistemi Azərbaycanda “SOC 2” və “SOC 3” rəylərini almış ilk və yeganə elektron sistemdir.

 

Bu, sistem vasitəsilə göstərilən xidmətlərin təşkilinin nəzarətdə olmasını, mənzillərin satışı zamanı Güzəştli mənzil sisteminin hər bir istifadəçisinə bərabər seçim şəraitinin yaradılmasını, şəffaflığın və operativliyin təmin edilməsini təsdiqləyir.

 

Bununla yanaşı, “Amerika Sertifikatlaşdırılmış İctimai Mühasiblər İnstitutu”nun (AICPA) müəyyən etdiyi təhlükəsizlik, konfidensiallıq, proseslərin bütövlüyü (tam, etibarlı və dəqiq), əlçatanlıq və fərdi məlumatların qorunması kimi tələblərinə uyğun olaraq “Güzəştli mənzil” sistemindən istifadə zamanı vətəndaşların rahatlığını təmin etmək məqsədilə müvafiq təkmilləşdirilmə işləri Mənzil İnşaatı Dövlət Agentliyi tərəfindən müntəzəm olaraq davam etdirilir.

 

 

Qeyd edək ki, sadalanan tələblərdən biri də mənzil seçimi prosesində iştirak edən istifadəçilər tərəfindən “CAPTCHA” (simvollardan ibarət avtomatlaşdırılmış kod) kodunun daxil edilməsi ilə bağlıdır. Güzəştli mənzil sistemində tətbiq edilən bu yenilik mənzil seçimi zamanı şəffaflığın təmin olunması, bərabər şəraitin yaradılması prinsipinin qorunub saxlanılmasına imkan verəcəyi, eyni zamanda sistemin təhlükəsizliyini daha da möhkəmləndirəcəyi bildirilir.

e-Azərbaycan bölməsindən digər xəbərlər

Daha çox