Məlumat verdiyimiz kimi, Heydər Əliyev Fondunun təşəbbüsü ilə Nəqliyyat, Rabitə və Yüksək Texnologiyalar Nazirliyi Məlumat Hesablama Mərkəzinin mütəxəssisləri tərəfindən hazırlanan və “Made in Azerbaijan” brendi altında təqdim olunan “Danışan kitabxana” layihəsi beynəlxalq müsabiqədə “Çempion layihə” mükafatına layiq görülüb. Mükafat dünən Beynəlxalq Telekommunikasiya İttifaqı tərəfindən təsis edilən “İnformasiya Cəmiyyəti üzrə Ümumdünya Sammiti – 2019 Mükafatları” (WSIS Prizes – 2019) İsveçrə Konfederasiyasının Cenevrə şəhərində nümayəndə heyətimizə təqdim olunub.

Qeyd edək ki, audiokitabxanada klassiklərdən Nəcəf bəy Vəzirovun “Müsibəti Fəxrəddin”, Mirzə Fətəli Axundovun “Aldanmış kəvakib”, Cəfər Cabbarlının “Oktay Eloğlu”, Mir Cəlalın “Bir gəncin Manisefti” əsərləri ilə yanaşı müasir ədəbiyyatın nümunələrini də dinləmək olar.

“Danışan kitabxana”nın əsas məqsədi insanlara müasir, klassik və bədii ədəbiyyat nümunələrini dinləmək imkanı yaratmaqdır. İstifadəçilər günün istənilən vaxtı, “15 41” nömrəsinə zəng etməklə müxtəlif janrlara aid əsərləri seçib dinləyə bilirlər. Hazırda audiokitabxanada mövcud olan kitabların sayı 300-dən çoxdur. Bu günə qədər bu xidmətdən yararlanmaq üçün 45.000-dən çox müraciət qeydə alınıb. İstifadəçi istənilən vaxt dinlədiyi əsəri yarıda saxlaya və daha sonra qaldığı yerdən davam etdirə bilər.