“Azərbaycandan Xəzər dənizi üzərindən Türkmənistana fiber-optik kabelin çəkilməsi həyata keçiriləcək”.

TED.az xəbər verir ki, bunu “AzerTelecom” şirkətinin baş direktoru Fuad Allahverdiyev deyib.

Fuad Allahverdiyev qeyd edib ki, “AzerTelecom” şirkəti hazırda Azərbaycanın regional rəqəmsal mərkəzə çevrilməsi üçün “Azerbaijan Digital HUB” proqramını icra edir: “Proqram 3 mərhələdən ibarətdir. Birinci mərhələ Azərbaycan daxilində yeni infrastrukturun qurulması və xarici ölkələrdəki telekommunikasiya infrastrukturlarına inteqrasiya olunmasıdır. İkinci mərhələdə Azərbaycanın regionda ən böyük DATA Mərkəzinin inşa olunması nəzərdə tutulur. Gələcəkdə Azərbaycanda qurulacaq internet mübarizə mərkəzlərinin yaradılması ilə Bakı şəhəri də dünyanın internet xəritəsinə əlavə ediləcək. Üçüncü mərhələ isə bu infrastruktur quruculuğunun nəticəsində yaranan platforma üzərində Azərbaycanda rəqəmsal ekosistemin formalaşdırması üçün həllərin tətbiq olunmasından ibarətdir. Hazırda biz proqramın birinci hissəsinin icrasındayıq. Yeni mərkəz yaradılır. Bu mərkəz gələcəkdə internet məzmunu istehsalçılarının yerləşdirilməsi üçün nəzərdə tutulan bir məlumat mərkəzi olacaq”.

Fuad Allahverdiyev onu da əlavə edib ki, Azərbaycan Dəmir Yolları ilə birlikdə dəmir yollarının qorunan zolağı boyunca yeni fiber-optik kabellərin çəkilişi davam etdirilir: “Həmçinin Transxəzər layihəsi daxilində Azərbaycan və Asiya üzərində Xəzər dənizindən keçən fiber-optik kabel inşasını nəzərdə tuturuq. Hazırda layihənin icrasına başlanıb. Transxəzər layihəsi iki mərhələdən ibarət olacaq. Birinci mərhələdə Azərbaycan Xəzər dənizi üzərindən fiber-optik kabelə Qazaxıstan istiqamətində, ikinci mərhələdə isə Azərbaycandan Xəzər dənizi üzərindən Türkmənistana fiber-optik kabelin çəkilməsi həyata keçiriləcək”.

Zeynəb ƏKBƏR