“Son illər ölkəmizdə makroiqtisadi sabitliyin, iqtisadi artımın davam etməsi və maliyyə dayanıqlılığının günbəgün güclənməsi daha əlamətdar olub. Məhz belə bir vaxtda Azərbaycan hökumətinin rəqəmsal transformasiya mərhələsinə daxil olması xüsusi əhəmiyyət kəsb edir”.

TED.az xəbər verir ki, bunu PAŞA Bankın İdarə Heyətinin Sədri Taleh Kazımov deyib.

Taleh Kazımov bildirib ki, böyük sürətlə dəyişən dünyada bütün sahələrdə olduğu kimi Bank xidmətlərinin də sürətli, çevik və daha da güvənli olması, müştərinin ən yüksək tələblərinə cavab verməsi zəruridir: “Məhz bu səbəbdən Bank xidmətlərinin rəqəmsallaşması PAŞA Bankın 2018-2020-ci il strategiyasının əsasını təşkil edir. Rəqəmsal həllərin işlənib hazırlanması yüksək texnologiyaların tətbiqi ilə yanaşı, həm də müvafiq texniki və təşkilati infrastrukturun yaradılması, bu sahədə peşəkarların yetişdirilməsi vasitəsilə mümkündür. Lakin Rəqəmsal transformasiyaya ilk addım atan bir biznes qurumu olaraq, biz ilk gündən aydın şəkildə dərk edirdik ki, bu transformasiyanı müştərilərimizdən və əməkdaşlıq etdiyimiz dövlət qurumlarından kənarda həyata keçirməyimiz mümkün deyil. Bu gün burada imzalanan Dövlət Özəl Tərəfdaşlıq memorandumu bu məqsədimizi dəstəkləyəcək çox önəmli vasitədir".

Qeyd edək ki, bu gün Rəqəmsal Ticarət Qovşağının üçüncü beynəlxalq forumunda ilk dəfə Dövlət və Özəl Tərəfdaşlığı memorandumu Asan İmza vasitəsi ilə onlayn imzalanıb.

Zeynəb ƏKBƏR