Hazırda bir çox qurumlar təcrübəli kadrlara üstünlük verdiyi kimi, təcrübəsi olmayan gəncləri də düşünür və onlar üçün əlverişli şərait yaradır.

TED.az xəbər verir ki, İnnovasiyalar Agentliyi uğurla təcrübə keçmiş və işə qəbul olmuş məzunlarının adlarını açıqlayıb.

Azərbaycan Dövlət İqtisad Universitetinin məzunları olan Nigar Məmmədova İnnovasiyalar Agentliyində İdarə Heyəti Sədrinin köməkçisi vəzifəsinə, Süleyman Süleymanzadə Qrantlar, kreditləşmə və investisiyalar şöbəsində mütəxəssis vəzifəsinə, Namin Eminov isə Maliyyə və Mühasibatlıq şöbəsində mütəxəssis vəzifələrinə təyin olunublar. Bakı Mühəndislik Universitetinin məzunları olan Şahlar Haşımzadə və Əmir İbrahimov informasiya texnologiyaları üzrə mütəxəssis, Bakı Dövlət Universitetinin məzunu olan Çingiz Çingizzadə isə hüquq şöbəsində mütəxəssis vəzifəsində işə başlayıblar.

Yerli sahibkarlara müasir texnologiya və texnoloji avadanlıqların əldə olunmasında yardım göstərən, innovativ layihələri, o cümlədən startapları stimullaşdıran, onları qrant, güzəştli kredit və vençur vasitəsilə maliyyələşdirən İnnovasiyalar Agentliyində yeni təcrübə proqramına start verilib.

Təcrübə proqramına qoşulmaq istəyənlər İnnovasiya Agentliyinə müraciət edə bilərlər.

Günel QURBANOVA