AZ

Honor 8X: qiyməti və özəllikləri

10.10.2019 11:07

TED.az “TEDfon” rubrikasında hər gün bir sevilən telefon markasının rəsmi dilerlərdə təklif olunan qiymətlərini, eləcə də kredit və endirim şərtlərini araşdırır:

 

Növbəti model Honor 8X telefonudur:

 

Honor 8X smartfonu çərçivəsiz FullView ekranı, müasir dizaynı, dayanıqlı batareyası, 20 Mp arxa, 13 Mp ön kamerası ilə istifadəçilərə rahat və zövqlü təcrübə yaşadır.

 

Bu model müasir və eleqant görünüşlü yeni smartfon axtaranlar üçün əla seçim ola bilər. Son dərəcə incə və estetik görünüşə malik telefon, həmçinin güclü texniki tərəfləri və innovativ yenilikləri ilə də diqqət cəlb edir. 8 nüvəli prosessor və 4 GB operativ yaddaşla istədiyiniz oyun və tətbiqləri rahatlıqla istifadə edə biləcəksiniz. 64 GB daxili yaddaş isə telefonunuzda istədiyiniz qədər şəkil, video və digər multimedia fayllarını rahatlıqla saxlamağa imkan verəcək. 

 

Android əməliyyat sisteminə sahib telefon Android 8.1 (Oreo) versiyası ilə çalışır.

 

1080х2340 pikselə sahib cihazda 3G, 4G, GPS texnologiyası da mövcuddur.

 

İki sim karta, 3750 mAh. batareyaya sahib mobil cihazın ağırlığı 175 qr, ölçüsü isə 160.4x76.6x7.8 mm-dir.

 

Telefon Kontakt Home mağazlar şəbəkəsində 1 il zəmanətlə 549,99 manata təklif olunur.

 

Bundan başqa, mağaza mobil cihazı 6, 9, 12 aylıq faizsiz kreditlə də müştərilərə təqdim edir. 15 və 18 aylıq kreditlərdə isə müəyyən faiz hesablanır, rəsmiləşdirmə işləri üçün 5-7 faiz xidmət haqqı tutulur.

 

Mağazanın saytında o da qeyd edilib ki, məhsul kreditlə satılan zaman sistemdə yuvarlaqlaşdırma tətbiq olunduğuna görə ümumi qiymətdə fərq yarana bilər.

 

Bu model üzrə endirim yoxdur.

 

Sözügedən telefon Baku Electronics-də də eyni qiymətə, 549 manata nəğd şəkildə təklif olunur.

 

Şirkət bu modeli 12 aylıq kreditlə də təklif edir. Bu zaman telefon alıcıya 612 manata başa gəlir.

 

Telefon İrşad Elektronics mağazalarında da 549 manata satılır. Qeyd edək ki, bu qiymət endirimli şəkildədir. Çünki mağazanın saytında əvvəlki qiymət kimi, 599 manat göstərilib.

 

Mağaza telefonu ilkin ödənişsiz, 6, 12, 18 aylıq kreditlə də təklif edir. İlk iki seçimdə hansısa faiz tutulmur. 18 aylıq kredit seçimində isə telefon alıcıya 647,82 AZN-ə başa gəlir.

 

Saytda məhsulun rəsmiləşdirilməsi zamanı 4-10% komissiya haqqı tələb oluna biləcəyi də qeyd olunub.

 

Cavid QƏDİR

Texnologiya bölməsindən digər xəbərlər

Daha çox