“İKT LAB olaraq xanımlar üçün 2020-ci ildə böyük bir İKT layihəsi hazırlayırıq. Hazırda layihə üzərində işlər aparılır. Sözügedən layihə regional şəkildə aparılacaq. 18 yaşdan yuxarı xanımlar İKT layihəsinə qoşulacaqlar. 2020-ci ildə reallaşacaq layihənin böyük maraq doğuracağına əminik”.

Bunu Nəqliyyat, Rabitə və Yüksək Texnologiyalar Nazirliyinin (NRYTN) İKT-nin Tətbiqi və Tədrisi Mərkəzinin (İKT LAB) baş mütəxəssisi Zakir İbrahimov 13-cü Azərbaycan Beynəlxalq Təhsil Sərgisində TED.az-a açıqlamasında deyib.

Zakir İbrahimov bildirib ki, sərgidə NRYTN tərəfindən əşyaların interneti laboratoriyası nümayiş etdirilir: "Qeyd edim ki, əşyaların interneti Azərbaycanda bu formatda yeganə laboratoriyadır. "Microsoft" şirkəti ilə imzalanmış memorandum əsasında çalışırıq. Layihəmiz Bakutell sərgisində daha geniş nümayiş olunacaq. Bugünkü sərgidə isə şagird və tələbələri sözügedən layihədə iştirak etməyə qoşmaq istəyirik. Belə ki, bəzi startaplar əşyaların interneti laboratoriyasında prototip olaraq hazırlana bilər".

Z.İbrahimov qeyd edib ki, tələbələr layihəyə böyük maraq göstərir: "Onların proqramlaşdırma və ya texniki fənlərdən baza bilikləri mütləq olmalıdır ki, bu kimi layihələrdə iştirak edə bilsinlər. İKT LAB-ın təlim mərkəzi şəbəkə inzibatçılığı təlimlərini, "Microsoft"la əməkdaşlığımız olduğu üçün sistem inzibatçılığı və digər İKT təlimləri keçirilir. Təlimlərimiz daha çox tələbələrə yönəlib. Hal-hazırda Bakı Mühəndislik Universiteti, Qərb Universiteti, Azərbaycan Dövlət Neft və Sənaye Universiteti ilə əməkdaşlıq edirik. Adlarını çəkdiyim universitetlərin tələbələri İKT LAB-da praktika keçirlər və təlimlərə qoşulurlar. İKT LAB Azərbaycanda yeganə distant təlim mərkəzidir. Bakıdan başqa, 18 regionda filiallarımız var. Bu filiallarda məktəblilər üçün İKT, Microsoft proqramları ödənişsiz şəkildə keçirilib”.

Zeynəb ƏKBƏR