Azərbaycanın mobil telefon bazarında ən çox paya sahib istehsalçı Samsung şirkətidir. Oktyabrın 1-nə olan statistikaya görə, qurumun bazar payı 56,5 faiz təşkil edir. Bu göstərici ilə Samsung ən yaxın izləyicisi Xiaomi şirkətini (15,3 faiz) təxminən 4 dəfə qabaqlayır. TED.az olaraq “TEDfon” rubrikasında bu dəfə Samsung-un daha bir sevilən markası – Samsung Galaxy A30 ilə qarşınızdayıq.

Samsung Galaxy A30

Android əməliyyat sisteminə sahib smartfon Android 9.0 (Pie) versiyası ilə çalışır. 1080:2340 pikselə sahib cihazın əsas və ön kamerası 16 Mp ölçüyə malikdir. Mobil telefonun operativ yaddaşı 3, daxili yaddaşı isə 33 GB-dır.  Octa-core (2x1.8 GHz & 6x1.6 GHz) prosessoru ilə təchiz olunub. Barmaq izi oxucu, 3G, 4G, GPS texnologiyası da mövcuddur. İki sim karta, 4000 mAs batareyaya sahib mobil cihazın ağırlığı 165 qram, ölçüsü isə 158.5x74.7x7.7 mm-dir.

Telefon Kontakt Home mağazlar şəbəkəsində 469,99 manata təklif olunur.

Bundan başqa, mağaza mobil cihazı 6, 9, 12 aylıq faizsiz kreditlə də müştərilərə təqdim edir. 15 və 18 aylıq kreditlərdə isə müəyyən faiz hesablanır. Əlavə olaraq, kreditlə satış zamanı rəsmiləşdirmə işləri üçün 5-7 faiz xidmət haqqı tutulur.

 Bu model mağazada 1 illik zəmanətlə müştəriyə təklif edilir.

Sözügedən telefon Optimal Electronics-də 469 manatdır. Əlavə olaraq, Birkart istifadəçilərinə özəl 18 ayadək faizsiz kredit kampaniyası mövcuddur.

İrşad Elektronics-in saytında bu telefon müştərilərə 469 manata təklif edilir.

Mağaza telefonu ilkin ödənişsiz, 6, 12, 18 aylıq kreditlə də təklif edir. İlk iki seçimdə hər hansı faiz tutulmur. 18 aylıq kredit seçimində isə telefon alıcıya 553,42 manata başa gəlir.

Saytda məhsulun rəsmiləşdirilməsi zamanı 4-10% komissiya haqqı tələb oluna biləcəyi də qeyd olunub.

Baku Electronics-in saytında da sözügedən telefon 469 manatdır. 12 aylıq kreditlə alındıqda isə smartfonun qiyməti 564 manat təşkil edir.

Music Galery mağazalar şəbəkəsində smartfon 469,9 manata təklif olunur. Bu mağazada, həmçinin Bakı şəhəri daxilində və 30 kilometrədək şəhər ətrafına çatdırılma pulsuzdur.

World Telecom-un saytında bu telefon 469 manatadır. 6 aylıq faizsiz kreditlə əldə etmək üçün ilkin olaraq 234,5 manat ödəmək lazım gəlir. 12 aylıq kredit şərtilə telefon alıcıya 528 manata başa gəlir. Birkart istifadəçilərinə isə 12 aylıq faizsiz kreditlə təklif olunur.

Bundan başqa, məhsulun rəsmiləşdirilməsi zamanı 5-10% komissiya məbləği tələb oluna bilər. İş yerinizdən asılı olaraq isə 1, 2 və ya 3 aylıq ilkin ödəniş şərti var.

Cavid QƏDİR