Azərbaycanlı İT mütəxəssisi, təlimçi Fərhad Kərimov 7-ci dəfə Microsoft Certified Trainer (MCT) kimi təsdiqlənib.

Bununla bağlı TED.az açıqlama verən Fərhad Kərimov bildirib ki, bu sertifikata sahib şəxs avtomatik olaraq beynəlxalq təlimçi kimi tanınır: “Microsoft Certified Trainer sertifikatı istənilən bir ölkədə Microsoft şirkətinin təsdiqlədiyi, proqramını hazırladığı təlimləri rəsmi təlimçi kimi keçmə hüququ verilir. Artıq 7-ci ildir ki, sözügedən sertifikatla beynəlxalq təlimçi kimi təsdiqlənirəm. Qeyd edim ki, sözügedən sertifikat Azərbaycanda bir neçə şəxsdə var”.

Fərhad Kərimov qeyd edib ki, ilk dəfə Microsoft Certified Trainer (MCT) təlimçisi statusunu almaq üçün Türkiyədə imtahan verib: “İmtahan təlim xarakterli keçdi. Namizdələr təlimçi kimi həm texniki, həm də psixoloji olaraq sınaqdan keçirildi. Keçdiyimiz təlimlər izlənildi. Sonra bütün bu proseslər video görüntü şəkildə Microsoft şirkətinə göndərildi. Şirkətdən müsbət rəy aldıqdan sonra isə namizədlərə Microsoft Certified Trainer statusu verildi. Hər il keçdiyimiz təlimləri və beynəlxalq sertifikatları toplayıb Microsoft şirkətinə göndəririk və şirkət namizdəliyimizə yenidən baxıb beynəlxalq təlimçi kimi bizi təsdiqləyir”.

Microsoft Certified Trainer olmağın bir sıra üstünlükləri var, deyə Fərhad Kərimov vurğuladı: “Təlimçi dərsləri sözügedən şirkətin proqramına uyğun olaraq tədris edir. Microsoft şirkətinin metodologiyasını tətbiq edir. Şirkət haqqında ən son yenilikləri ilk olaraq təlimçilər əldə edir. Xarici ölkələrdə təlim keçmək üçün bir neçə təklif almışam. Xarici şirkətlər onlayn təlim keçməyim üçün təkliflər ediblər. Sadəcə olaraq zaman azlığından və ya ölkə daxilində keçdiyim təlimlərlə onların dediyi vaxt üst-üstə düşdüyündən razılaşmamışam. Təlimlərimi əsasən Azərbaycanda keçirəm”.

Qeyd edək ki, Fərhad Kərimov Dövlət Neft Fondunun İnformasiya Texnologiyaları Əməliyyatları şöbəsinin müdiri,  Educators.Pro IT Təlim və IT Xidmətlər mərkəzinin rəhbəridir.

Zeynəb ƏKBƏR