“Azərbaycan Memarlıq və İnşaat Universitetində (AzMİU) bütün dərs prosesi interaktiv şəkildə aparılır. Hər bir dərs slaydlar vasitəsilə keçirilir. AzMİU-da bütün ixtisaslar üçün onun xüsusi proqram təminatında məşğələ və laboratoriya dərslərində istifadə olunur. Qeyd edim ki, eyni proqram təminatını hər bir ixtisasda keçmək mümkün deyil. Ona görə də biz ayrı-ayrılıqda hər bir ixtisas üçün öz proqram təminatını məşğələ və laboratoriya dərslərini bunun üzərində qururuq”.

Bu sözləri TED.az-a açıqlamasında Azərbaycan Memarlıq və İnşaat Universitetinin (AzMİU)  Strateji İnkişaf üzrə prorektoru Ülkər Səttarova deyib.

Ülkər Səttarova bildirib ki, AzMİU-da  biznes inkubatoru fəaliyyət göstərir: “Startap mərkəzimiz İnnovativ biznes inkubator adlanır. Orada tələbələrin, həm sahibkarlıq bilikləri inkişaf etdirilir, həm də startap layihələrinə universitet rəhbərliyi tərəfindən mentorluq edilir. Bir sıra startapçımız müxtəlif müsabiqələrdə iştirak edərək, qalib gəlib. Sosial, memarlıq və inşaat yönümdə və s. bir sıra maraqlı layihələrimiz də var. Bu kimi layihələri biz ilk mərhələdən götürüb inkişaf etdiririk və beynəlxlaq müsabiqələrə çıxarırıq. Bu yaxınlarda AzMİU tələbələri “CanSat Azerbaijan” müsabiqəsində iştirak ediblər. Onlar bu müsabiqədə havaya peyk buraxıblar. AzMİU-da demək olar ki, bütün dərsliklər, mühazirələr elektron şəkildə yazılıb, hazırlanıb. Dərs vəsaiti baxımından AzMİU distant şəkildə dərs prosesinə hazırdır. Qeyd edim ki, “Eduexpo” sərgisində AzMİU-nun təmsil olunduğu stendi universitetin tələbələri hazırlamışdılar. O stendi tələbələrimiz İtaliya-Azərbaycan dizayn mərkəzində düzəldiblər. Eyni zamanda, sərgidə  tələbələrin diplom işləri video-çarx şəklində nümayiş olunub”.

Zeynəb ƏKBƏR