“InnoWeek – İnnovasiya həftəsi” çərçivəsində Heydər Əliyev Mərkəzində keçirilən “Roboday” festivalında robototexnika üzrə tədris aparan şirkətlər iştirak edirlər. Bildiyiniz kimi, Nəqliyyat, Rabitə və Yüksək Texnologiyalar Nazirliyi (NRYTN) yanında fəaliyyət göstərən İnnovasiyalar Agentliyi əsasnaməsinə uyğun olaraq, Azərbaycanda robototexnika üzrə layihələri dəstəkləyir".

TED.az xəbər verir ki, bunu NRYTN-nin şöbə müdiri Rəşad Əzizov deyib.

Rəşad Əzizov bildirib ki, bu gün keçirilən "Roboday" festivalı ölkədə sözügedən sahədə yeni nəslin formalaşmasına yönəlib: "Hazırda ölkədə bir sıra dövlət qurumları robototexnikanın inkişafı ilə məşğuldur. Bu qurumlar sırasında NRYTN, Gənclər və İdman Nazirliyi, Təhsil Nazirliyi və s. bu istiqamətdə tədris işləri aparır. Eyni zamanda, Azərbaycan sənayesinin bütün sahələrində artıq robototexnika üzrə layihələr həyata keçirilir. İnnovativ yanaşma layihələrin effektivliyinin artırılmasına yönəlib. Qeyd edim ki, robototexnikanın inkişafı birbaşa kadrların yetişdirilməsi ilə bağlıdır. Bu kadr yetişdirmə siyasəti mütləq şəkildə təchizat işlərini nəzərdə tutur".

Şöbə müdiri qeyd edib ki, bugünkü tədbirdə layihələr bu istiqamətə yönlənib: "Tədbir zamanı robototexnika üzrə müsabiqələr, robosport, dron olimpiadası keçirilir. Bu müsabiqələr çərçivəsində ən fəal, istedadlı uşaqları gündəmə gətirir".

"Nəqliyyat, Rabitə və Yüksək Texnologiyalar Nazirliyi, Gənclər və İdman Nazirliyi, AREA ilə birgə gələn ay dünya robot olimpiadasında iştirak edəcəyik. Bu gün sözügedən müsabiqədə ölkəmizi təmsil edəcək komanda üzvləri də "Roboday" festivalında iştirak edərək öz bilik və bacarıqlarını nümayiş etdirir".

Zeynəb ƏKBƏR