Yeni cinayətlərin qarşısının alınmasında elektron monitorinq mühüm rol oynayır
“Məhkumların cəza çəkdiyi dövrdə yeni cinayətlərin törədilməsinin qarşısının alınmasında elektron monitorinq mühüm rol oynayır”.
TED.az xəbər verir ki, bunu "Məhkumların sosial reinteqrasiyası, azadlığa çıxdıqdan sonra təkrar cinayət törətmə hallarının azaldılması – probasiya və əlaqəli qurumlarla əməkdaşlıq" mövzusunda Strasburqda təşkil olunan görüşün çərçivəsində Azərbaycanın Ədliyyə Nazirliyi Probasiya Xidmətinin Elektron Monitorinq İdarəsinin rəisi Elmin Həsənov deyib.
E.Həsənov Azərbaycanda həyata keçirilən mütərəqqi məhkəmə-hüquq islahatları və tətbiq olunan yeniliklər barədə məlumat verib və ölkəmizdə Probasiya xidmətinin nəzdində azadlıqdan məhrumetməyə alternativ cəzaların icrasında elektron nəzarət vasitələrinin tətbiq edildiyini qeyd edib. Azərbaycanın bu sahədə təcrübəsinə avropalılar maraq göstəriblər.
Məlumat üçün bildirək ki, bu gün Avropa Şurasının (AŞ) İnsan Hüquqları və Qanunun Aliliyi üzrə Baş Direktorluğunun təşkilatçılığı Strasburqda "Məhkumların sosial reinteqrasiyası, azadlığa çıxdıqdan sonra təkrar cinayət törətmə hallarının azaldılması – probasiya və əlaqəli qurumlarla əməkdaşlıq" mövzusunda çoxtərəfli görüş keçirilib.
Fatimə ZÜLFİQAR