Marsda şəkil çəkmək “Curiosity Mars” roverinin (Marsa tədqiqat aparmaq üçün yerləşdirilmiş  qurğu) əsas vəzifələrindən biri deyil, lakin onun çəkdiyi fotolar arasında tez-tez cəlbedici görüntülərə rast gəlinir. TED.az xəbər verir ki, NASA “Qırmızı Planet”in səthində rover tərəfindən hazırlanan yeni  fotosessiya yayımlayıb.

Hazırda qurğu 5,5 kilometrə yaxın hündürlükdə yerləşən Şarp dağının altındadır. O, 2012-ci ilin ortalarından etibarən yavaş-yavaş Geyl kraterinin həndəvərində gəzərək ətrafı araşdırmağa başlayıb. “NASA”ya və roveri idarə edən “Jet Propulsion Laboratoriyası”na (JPL) göndərilən son görüntülərdə yaxın ətraf aydın görsənir.

Şəkillər roverə quraşdırılmış 17 sol naviqasiya kamerasından biri ilə çəkilib. Geoloji tədqiqatlar üçün rəngli şəkillər çəkən digər sensorlardan fərqli olaraq, naviqasiya kameraları qara və ağ kadrlar yaradır. 

Yeni görüntülərdə tozlu bir düzənliyin üstündən qalxan Geyl kraterinin kənarları görünür. Hesab edilir ki, krater təxminən 3,8 milyard il əvvəl nəhəng bir meteoritin düşməsindən sonra meydana gəlib və daha sonra Mars küləyinin təsirindən öz görünüşünü dəyişib.