AMEA İnformasiya Texnologiyaları İnstitutunda keçirilən növbəti elmi seminarında “Texnologiya parklarının planlaşdırma və inkişafı siyasəti: texnologiyanın transferi və kommersiyalaşdırılması” mövsuzunda məruzə dinlənilib.

TED.az xəbər verir ki, seminarda Cənubi Koreyanın “e-dövlət - 2020” strategiyasından danışılıb. AMEA İnformasiya Texnologiyaları İnstitutunun elmi işçisi Turqut Yasin diqqətə çatdırıb ki, Cənubi Koreyanın “e-dövlət - 2020” strategiyası qabaqcıl texnologiyanın tətbiqi ilə vətəndaş mərkəzli e-dövlət xidmətlərinin göstərilməsinə hədəflənmişdir. Məruzəçi diqqətə çatdırıb ki, təqdim olunan tədqiqatın əsas məqsədi Azərbaycanda e-dövlət layihələrinin inkişaf səviyyəsini təhlil etmək, eyni zamanda e-dövlət xidmətlərinin qiymətləndirməsi meyarlarını və vətəndaş məmnuniyyətini müəyyənləşdirməkdir. Vurğulanıb ki, vətəndaşların e-dövlət xidmətlərindən geniş istifadəsi, əks əlaqə vasitələrinin olması vətəndaş məmnuniyyəti səviyyəsinin artmasında böyük rol oynayır. E-xidmətlərdən istifadə səviyyəsi vətəndaşların məmnuniyyət göstəricisi hesab oluna bilər.