5-7 noyabr tarixlərində Strasburqda Avropa Şurasının (AŞ) Penoloji Əməkdaşlıq Şurasının 9-cu plenar iclası keçirilib.

TED.az xəbər verir ki, AŞ-a üzv dövlətlərinin, AŞPA-nın (Avropa Şurası Parlament Assambleyasının), İnsan Hüquqları üzrə Komissarlığının, Cinayət Problemləri üzrə Avropa Komissarlığının və digər tərəfdaş təşkilatların nümayəndələrinin qatıldığı tədbirdə Azərbaycanın Ədliyyə Nazirliyi Probasiya xidmətinin Monitorinq idarəsinin rəisi Elmin Həsənov da iştirak edib.

Tədbirdə həbsxana və probasiya nəzarətində olan məhkumlara münasibətdə AŞ normativ sənədlərinin tələblərinə riayət olunması, məhkumların yeni cinayət törətməsinin qarşısının alınmasında və cinsi hüquq pozuntuları ilə bağlı məhkum edilmiş şəxslərin cəmiyyətə qaytarılmasında elektron monitorinqin rolu barədə fikir mübadiləsi aparılıb, probasiya fəaliyyətinə dair təqdimatlar keçirilib.

Tədbir çərçivəsində Avstriyanın, Belçikanın, Türkiyənin, Avropa Probasiya Konfederasiyasının nümayəndələri ilə işçi görüşlərdə son illər ölkəmizdə ədliyyə sahəsində aparılan islahatlar və yeniliklər barədə məlumat verilib.

Nazirliyin Probasiya xidmətinin fəaliyyəti, azadlıqdan məhrumetməyə alternativ cəzaların icrasında elektron nəzarət vasitələrinin tətbiqi maraqla qarşılanıb, əməkdaşlıq perspektivləri barədə fikir mübadiləsi aparılıb.