AZ

Google Kanadada Ağıllı şəhər inşa edəcək

11.11.2019 21:00

“Sidewalk Labs” Kanadanın Toronto şəhərinin boş ərazisində “Ağıllı şəhər” salacaq.

 

TED.az xarici mətbuata istinadən xəbər verir ki, şəhər meriyası şirkətin müraciətinə müsbət cavab verib, lakin bu təşəbbüs üçün daha az ərazi ayırıb. Torontonun inkişafına cavabdeh olan “Waterfront Toronto” qrupu müraciəti yekdilliklə təsdiq edib.

 

“Sidewalk Labs”ın inşa edəcəyi məhəlləyə cəmi 0,05 kvadrat kilometr torpaq sahəsinin ayrılması nəzərdə tutulub. Şəhər rəhbərliyinin qərarı ictimai müzakirəyə təqdim ediləcək və yekun rəy 2020-ci ilin martında veriləcək.

 

Şirkətin təmsilçiləri bildiriblər ki, “Ağıllı şəhər” insanların işə getməsi üçün hazırlıq müddətini azaldacaq, evləri daha da ucuzlaşdıracaq, yeni iş yerləri açacaq və sakinlər üçün yüksəksəviyyəli rahat şərait yaradacaq.

 

“Sidewalk Labs” bu layihəyə qoyacağı sərmayə müqabilində əmlak vergisindən və gəlirlərdən pay tələb edir.

 

Şirkətin mütəxəssisləri hesab edirlər ki, ən müasir texnologiyaların tətbiq ediləcəyi “Ağıllı şəhər” sayəsində Torontonun dünyanın ən inkişaf etmiş meqapolisləri ilə rəqabətqabiliyyətlilik gücü artacaq.

 

Qeyd edək ki, “Sidewalk Labs” “Google” korporasiyasına daxil olan “Alphabet” şirkətinin nəzdində fəaliyyət göstərir.

Dünya bölməsindən digər xəbərlər

Daha çox