Himalay Məmişov: Bu il 15 min şəxsə e-qaydada pensiya təyin olunub
"Dövlət başçısının tapşırığına əsasən bu ilin əvvəlindən ölkəmizdə ilk proaktiv xidmət kimi pensiyaların avtomatlaşdırılmış qaydada təyinatı mexanizminə keçilib. İl ərzində pensiyaya çıxan vətəndaşlarımızın 80%-nin sənədləşmə işi e-pensiya sistemi üzərindən aparılıb və bu ilin ötən dövründə artıq 15 min şəxsə e-qaydada pensiya təyin olunub".
TED.az xəbər verir ki, bunu Əmək və Əhalinin Sosial Müdafiəsi Nazirliyinin yanında Dövlət Sosial Müdafiə Fondunun direktoru Himalay Məmişov deyib.
H.Məmişov bildirib ki, 2019-cu ilin ilk aylarından sosial müavinət və təqaüdlərin də elektron təyinatı infrastukturunun qurulmasına başlanılıb: "Uşağın doğulmasına görə birdəfəlik müavinətin e-təyinatı sistemi ötən ay istifadəyə verilib və e-qaydada 7 minədək bu növ təyinat aparılıb. Növbəti addım kimi daha iki sosial təminat növü – sağlamlıq imkanları məhdud 18 yaşadək uşağa aylıq müavinət və həmin uşağa qulluğa görə Prezidentin aylıq təqaüdünün elektron təyinatı mexanizmi hazırlanaraq işə salınıb".
Zeynəb ƏKBƏR