AZ

Mexaniki qaz sayğaclarına geri dönəcəyik

16.11.2019 10:36

“Azəriqaz” İstehsalat Birliyinin baş direktoru Ruslan Əliyev yeni nəsil smart tipli sayğaclardan imtina barədə qərar verib. TED.az xəbər verir ki, “Azəriqaz” rəhbəri buna səbəb kimi vətəndaşlardan daxil olan müraciətlər arasında balans artırmada problemlərin yaşandığını, kartların tez-tez bloka düşdüyünə dair şikayətlərin çoxluq təşkil etməsini göstərib. Həmçinin şirkətin maliyyə durumu nəzərə alınaraq belə bir qərar verildiyi bildirilib.

 

Məlum olub ki, 2018-ci ildə sifariş verilən “İtron” şirkətinə məxsus yeni nəsil sayğaclarda həm də bir sıra problemlər meydana çıxıb. Buna görə də bir müddət əvvəl start verilən kütləvi sayğac dəyişdirilməsi prosesi dayandırılıb və əvvəllər istifadə olunan mexaniki sayğacların sifariş verilməsi barədə qərar qəbul edilib. Mexaniki sayğacların xüsusiyyətinə görə hansısa texniki səbəbdən abonentlərin qaz təminatı dayandırılıb yenidən bərpa edildikdə kartın bloka düşməsi kimi problem yaranmır.

 

"Azəriqaz” İB-nin İctimaiyyətlə əlaqələr şöbəsinin rəisi Ceyhun Səfərov faktı təsdiqləyib. C.Səfərov bildirib ki, şirkətin maliyyə vəziyyəti nəzərə alınaraq smart tipli sayğacların alışının azaldılması barədə qərar verilib: “Mexaniki sayğaclarda abonent sərfiyyatına görə ödəniş edir. Hər ay abonentə qaz sərfiyyatı barədə bildiriş verilir və o ödənişi edir. Hesab edirik ki, bundan sonra quraşdırılacaq mexaniki sayğaclarda hansısa narazılıq yaranmayacaq. Bu zaman vətəndaş balansına pul yükləyə bilmədiyinə görə qazsız qalmayacaq. Ola  bilər ki, sonrakı mərhələdə şirkət daha sərfəli və yeni nəsil sayğaclar təklif etsin. Təbii ki, biz bu təklifləri dəyərləndirəcəyik.”

TED + bölməsindən digər xəbərlər

Daha çox