Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidməti (ETX) “Ghosty” tətbiqi ilə bağlı Feysbuk komandasına birbaşa müraciət edib. TED.az xəbər verir ki, müraciət əsasında son günlər ölkəmizdə, eləcə də xaricdə İnstaqram sosial şəbəkəsinin istifadəçilərinin böyük narahatlığına səbəb olan, istifadəçilərin məxfilik hüquqlarını və İnstaqramın gizlilik qaydalarını pozan “Ghosty” tətbiqi Google Play Store və App Store-dan silinib.

Naməlum tərtibatçı (developer) tərəfindən yaradılan bu tətbiq gizli İnstaqram hesablarını açmağa, istifadəçinin fərdi məlumatlarını görməyə və hesabdakı şəkilləri yükləməyə imkan verir. Tətbiq qeydiyyatdan keçərkən İnstaqram istifadəçisinin giriş məlumatlarını (loqin və parol) əldə edərək həmin hesabdakı gizli profilləri müəyyən edir. Bu gizli profillərdən hər hansı birinə baxmaq istədikdə proqram fərqli bir sessiya açaraq profilə baxmaq istəyən şəxsə gizli profili tamamilə açıq şəkildə göstərir. Dolayısı ilə bu tətbiqdən istifadə edərək login və parolunu təqdim edən şəxslər öz hesabındakı gizli profillərə baxılması üçün digər “Ghosty” istifadəçilərinə icazə verirlər.

Tətbiqin populyarlığı artdıqca açılan gizli profillərin sayı da çoxalır. Xarici mənbələrin məlumatına görə, tətbiq istifadəyə verildiyi andan etibarən Google Play Store üzərindən 500 000 dəfədən çox yüklənilib.

İnstaqramın istifadəçilərə profili gizli saxlamaq və yalnız təsdiq edilmiş izləyicilərə paylaşımları, şəkilləri və ya videoları görməyə icazə vermək kimi seçim imkanı verdiyini nəzərə alsaq, bu, istifadəçilərin məxfiliyinin ciddi şəkildə pozulması deməkdir. Eyni zamanda İnstaqram istifadə şərtlərinə görə, istifadəçilər öz hesabları üzərindən digər istifadəçilərə hüquqlarını ötürə bilməzlər.

Elektron Təhlükəsizlik Xidmətinin müraciətindən sonra Feysbuk komandası Google ilə birlikdə araşdırma aparıb, nəticədə tətbiq Google Play Store və App Store-dan silinib. Feysbuk rəhbərliyinin rəsmi məlumatına görə, İnstaqram qaydalarını pozan bu tətbiqi, eləcə də İnstaqramla bağlı qanunsuz fəaliyyəti dərhal dayandırması üçün “Ghosty” tətbiqinin tərtibatçısına rəsmi xəbərdarlıq göndərilib. Hazırda bu şəxsin məsuliyyətə cəlb edilməsi üçün Feysbuk tərəfindən tədbirlər görülür və təhlükəsizlik tədbirləri gücləndirilir.

ETX vətəndaşlara bu cür qeyri-rəsmi tətbiqləri yükləməməyi, giriş məlumatları kimi həssas məlumatları təqdim etməməyi, özlərinin və ətrafının məxfiliyini təhlükə altında qoymamağı tövsiyə edir. Vətəndaşlardan bu kimi hallarla qarşılaşdıqda Elektron Təhlükəsizlik Xidmətini məlumatlandırmaları xahiş olunur.