“Fiziki və hüquqi şəxslərə, o cümlədən kredit təşkilatlarına tərəfdaş olduqları işlər barədə məlumatların verilməsini təmin edəcək elektron xidmətin yaradılması ilə bağlı intensiv iş aparılır”.

TED.az xəbər verir ki, bunu Ədliyyə Nazirliyinin İcra Baş İdarəsinin rəisi – Baş icra məmuru Nurəddin Mustafayev deyib.

Nurəddin Mustafayev qeyd edib ki, “Elektron icra” informasiya sisteminin tətbiqi icra xidmətinin maddi-texniki təchizatının yaxşılaşdırılmasına da əlavə təkan verib: “Xidmətin infrastrukturunun müasirləşdirilməsi və maddi-texniki bazasının möhkəmləndirilməsi üzrə ardıcıl tədbirlər görülür. Ötən dövrdə dövlət büdcəsi hesabına, Dünya Bankı ilə birgə həyata keçirilən layihələr çərçivəsində 30-a yaxın yerli icra qurumları yeni inzibati binalarla, baş idarə və bütün yerli qurumlar əlavə kompüter və digər texniki avadanlıqlarla təmin edilib. Bununla yanaşı, xeyli sayda avtomobil alınaraq bütün yerli qurumların avtomobillərlə təchiz edilməsi həyata keçirilib”.

Zeynəb ƏKBƏR