AZ

Baş icra məmuru: 30-a yaxın məlumatın elektron əldə edilməsi icra prosesini əhəmiyyətli şəkildə sürətləndirib

21.11.2019 10:45

“İcraatların kağız formatından tam elektron müstəviyə keçirilməsini hədəfləyən “Elektron icra” informasiya sistemi artıq 3 ilə yaxındır ki, icra məmurlarının istifadəsindədir. Bu sistemin tətbiqi ilə icra sənədlərinin icrasının təşkili keyfiyyətcə yeni mərhələyə yüksəlib”.

 

TED.az xəbər verir ki, bunu Ədliyyə Nazirliyinin İcra Baş İdarəsinin rəisi – Baş icra məmuru Nurəddin Mustafayev deyib.

 

Nurəddin Mustafayev bildirib ki, 2017-ci ilin yanvar ayından fəaliyyətə başlayan “Elektron icra” informasiya sistemi hazırda 32 qurumda tamamilə tətbiq olunur: “10-dək dövlət orqanlarının elektron informasiya bazalarına inteqrasiyası təmin edilib, bir sıra qurumlardan 30-a yaxın məlumat ani rejimdə əldə edilməklə icra prosesi əhəmiyyətli şəkildə sürətləndirilib”.

 

 

“Artıq icra məmurları Daxili İşlər Nazirliyindən avtonəqliyyat vasitələri, o cümlədən onların üzərində həbsin və digər məhdudiyyətin olub-olmaması, Əmək və Əhalinin Sosial Müdafiəsi Nazirliyindən şəxslərin əmək haqqı, pensiya və digər ödənişləri, əmək müqaviləsi, eləcə də sığortaolunan qismində qeydiyyatının olub-olmamasını elektron şəkildə əldə edirlər. Eləcə də, Əmlak Məsələləri Dövlət Xidmətindən borcluların daşınmaz əmlakları barədə məlumatları, Dövlət Vergi Xidmətindən hüquqi və sahibkarlıq fəaliyyəti ilə məşğul olan fiziki şəxslərin bank hesabları, habelə VÖEN üzrə olan bütün məlumatlar da real vaxt rejimində əldə olunur. Bu gün Əhalinin Dövlət Reyestri Xidmətindən şəxsiyyət vəsiqəsi, qohumluq və ölüm faktı, Nəqliyyat, Rabitə və Yüksək Texnologiyalar Nazirliyindən tərəflərin mobil telefon nömrələri, notariuslardan vərəsəliyə dair şəhadətnamələrin, əmlaka dair etibarnamələrin verilib-verilməməsi barədə məlumatlar da elektronlaşdırılıb. Bununla yanaşı, daşınmaz əmlakların alqı-satqısı, icarəsi, ipoteka ilə yüklülüyünə dair məlumatları, “ASAN” xidmət üzərindən Azərbaycanda müvəqqəti və daimi yaşamaq üçün icazələrin alınması, xarici pasportlar, diplomlar və sahibkarlıq sahəsində aparılan yoxlamalar barədə məlumatları ani rejimdə əldə edirlər”, – deyə Baş icra məmuru qeyd edib.

 

Zeynəb ƏKBƏR

e-Azərbaycan bölməsindən digər xəbərlər

Daha çox