AZ

Evlərin satmaq öhdəliyi ilə kirayəyə verilməsi üzrə işlər yekunlaşmaqdadır – FONDDAN AÇIQLAMA

21.11.2019 12:44

Azərbaycan əhalisinin ən çox can atdığı məsələ daşınmaz əmlak, ev sahibi olmaqdır. Bu istiqamətdə əhalinin problemlərini həll etmək üçün dövlət səviyyəsində iş aparılır. Bununla əlaqədar ölkə prezidenti İlham Əliyev ipoteka kreditlərinə çıxış imkanlarının genişləndirilməsi üçün “Elektron ipoteka” sistemi yaradılması haqqında fərman imzalayıb.

 

TED.az fərmandan irəli gələn məsələlərin hansı şəkildə həll edildiyini öyrənmək üçün Azərbaycan Respublikasının İpoteka və Kredit Zəmanət Fonduna sorğu ünvanlayıb.

 

Fonddan verilən məlumata görə, sistem bu ilin iyunundan etibarən işləkdir, ipoteka kreditləşməsi sahəsində elektron xidmətlərin mərkəzləşdirilmiş qaydada təqdim edilməsinə nail olunub: “Bundan başqa, ipoteka kreditləşməsi mexanizmlərinin təkmilləşdirilməsi və bu sahədə şəffaflığın artırılması çərçivəsində “Elektron ipoteka” sistemi “Elektron hökumət” portalına inteqrasiya olunub. Müvafiq dövlət qurumlarının informasiya sistemlərindən və ehtiyatlarından tələb olunan məlumatların bu sistemə ötürülməsi imkanı təmin edilib”.

 

Fonddan verilən açıqlamada vurğulanıb ki, yeni sistem yalnız ipoteka kreditləşməsini deyil, fondun nizamnaməsində qeyd edilən bütün fəaliyyət istiqamətləri üzrə (sahibkarlıq kreditlərinə zəmanətlərin və faiz subsidiyalarının verilməsi, yaşayış sahələrinin satmaq öhdəliyi ilə kirayəyə verilməsi) elektron xidmətlərin mərkəzləşdirilmiş qaydada təqdim olunmasını nəzərdə tutur: “Paralel olaraq iştirakçılara elektron sistemə inteqrasiya olunmuş informasiya sistemləri və ehtiyatlarından müvafiq sənədlər barədə informasiya əldə etmək imkanı yaradılacaq. Sistem əhalinin, sahibkarlıq subyektlərinin, fondun əməkdaşlıq etdiyi müvəkkil təşkilatların təqdim edilən xidmətlərdən daha sürətli və səmərəli şəkildə istifadəsinə imkan verəcək”.

 

 

Qurumun mətbuat xidmətindən verilən açıqlamada o da qeyd olunur ki, hazırda fond tərəfindən sahibkarlıq kreditlərinə zəmanətlərin, faiz subsidiyalarının verilməsi, yaşayış sahələrinin satmaq öhdəliyi ilə kirayəyə verilməsi modulları üzrə işlər yekunlaşmaq üzrədir: “Yaxın zamanlarda bu istiqamətlər üzrə də elektron xidmətlərin əhalinin istifadəsinə verilməsi təmin ediləcək”.

 

“Hazırda sistem vasitəsilə yalnız ipoteka kreditlərinin verilməsi və onlara xidmət olunması həyata keçirilir. Vətəndaş bu sistem vasitəsilə ona xidmət edəcək müvəkkil bankı, qiymətləndiricini, sığortaçını müstəqil seçə, onlara müraciətlər göndərə və fondun təklif etdiyi xidmətlərdən yararlana bilər. Məsələn, ipoteka krediti almaq istəyən şəxs, ilk növbədə, elektron və ya ASAN İmza əldə etməli, “Elektron hökumət” portalında qeydiyyatdan keçməklə şəxsi kabinet yaratmalı, bu şəxsi kabinet üzərindən müvəkkil banklardan birinə elektron müraciət göndərməlidir (elektron müraciət göndərərkən vətəndaşın şəxsi kabinetinə özü barəsində məlumatlar digər dövlət orqanlarının elektron sistemlərindən avtomatik olaraq inteqrasiya olunur. İnteqrasiya olunmayan məlumatların isə vətəndaş tərəfindən sistemə manual olaraq əlavə edilmək imkanı vardır). Bundan sonra vətəndaş şəxsi kabinetinə gələn bildirişdə göstərilən müddət ərzində göstərilən sənədlərlə banka yaxınlaşmalıdır. Bank isə 3 iş günü ərzində ipoteka krediti almaq istəyən şəxsə ipoteka kreditinin verilməsinə dair ilkin razılıq və ya əsaslandırılmış imtina barədə qərar qəbul etməlidir.  Əgər razılıq olarsa, 45 gün müddətində vətəndaş tərəfindən almaq istədiyi yaşayış sahəsi tapılmalı, 3 iş günü müddətində müvəkkil qiymətləndirici şirkət tərəfindən bu yaşayış sahəsinin qiymətləndirməsi həyata keçirilməlidir. Müvəkkil bank tərəfindən 5 iş günü müddətində kreditin verilməsinə dair qərar (razılıq və ya əsaslandırılmış imtina) qəbul edilməli, kreditin verilməsinə dair razılıq olarsa, 10 iş günü müddətində ipoteka kreditinin rəsmiləşdirilməsi və kreditin verilməsi həyata keçirilməlidir”, – sorğunun cavabında diqqətə çatdırılıb.

 

 

O da vurğulanıb ki, vətəndaş şəxsi kabineti vasitəsilə öz müraciətinin statusuna, ipoteka krediti üzrə ödənişlərinə və öhdəliklərinə nəzarət edə, lazım bildikdə isə ona xidmət edən müvəkkil təşkilata yeni istiqamətdə (öhdəliyin verilməsi, girovdəyişmə, restrukturizasiya və s.) müraciətlər göndərə bilər: “Yeni sistemin tətbiqi biznes proseslərin şəffaflığının artırılmasına, fondun xidmət sahələri üzrə rəsmiləşdirmə müddətlərinin, əməliyyat xərclərinin əhəmiyyətli dərəcədə azalmasına, müvəkkil banklar və fond tərəfindən maliyyə risklərinin idarə olunmasının effektivliyinin artırılmasına xidmət edir”.

 

Sonda qeyd olunub ki, sistemin qurulması zamanı fondun və vətəndaşların şəxsi məlumatlarının qorunması kimi əsas amillər çox yüksək səviyyədə nəzərə alınıb: “Bunun nəticəsində sistemin tətbiqindən bu günədək heç bir məlumatın kənara sızması və ya sistemin kiberhücuma məruz qalması halları baş verməyib”.

 

Cavid QƏDİR

e-Azərbaycan bölməsindən digər xəbərlər

Daha çox