Avropa Komissiyası Feysbuk və Microsoft şirkətlərinin Apple-a qarşı şikayətini qəbul edib
Feysbuk və Microsoft App Store-un işindən narazıdır. Şirkət nümayəndələrinin sözlərinə görə, texnologiya nəhənglərinin tətbiqləri App Store-da düzgün göstərilmir. İddialar Avropa İttifaqının(Aİ) Apple-a qarşı araşdırmasının bir hissəsi ola bilər.
TED.az xəbər verir ki, Aİ-nin Antiinhisar tənzimləyici orqanları Apple şirkətinə məxsus App Store-da Feysbuk və Microsoft tətbiqlərinin göstərilməsi problemini təsbit ediblər.
"Komissiya Apple App Store qaydaları ilə bağlı narahatlıqlardan xəbərdardır", — deyə Avropa Komissiyasının mətbuat katibi Arianna Podesta bildirib.
Hazırda Aİ Apple ilə bağlı dörd araşdırma aparır, onlardan üçü App Store-a, həmçinin orada yaradılmış əlavə məhdudiyyətlər və şərtlərə aiddir.
"Apple istehlakçılara Xbox Game Pass kimi bulud oyunlarından və abunə xidmətlərindən istifadə etməyə imkan verməyən yeganə açıq platformadır", — deyə Microsoft nümayəndələri App Store-da Project xCloud proqramına daxil olmaq problemini izah ediblər.
Apple tənqidləri qəbul etmir.