Dünənə olan məlumata əsasən, Prezident İlham Əliyevin çağırışına səs verən 8500-ə yaxın vətəndaş Səfərbərlik və Hərbi Xidmətə Çağırış üzrə Dövlət Xidmətinin aparatına elektron qaydada, həmçinin qeydiyyatda olduqları yerli idarə, şöbə və bölmələrinə gələrək könüllü olaraq orduda xidmət etmək məqsədilə qeydiyyata alınıblar.

TED.az orduda könüllü xidmət üçün elektron qeydiyyat qaydalarını təqdim edir:

Mövcud qanunvericiliyin tələblərinə uyğun olaraq, səfərbərlik zamanı və müharibə dövrü üçün öz təyinatlarını müəyyən etmək məqsədi ilə hərbi vəzifəlilər çağırış vərəqəsinə əsasən Хidmətin yerli idarə, şöbə və bölmələrinə gəlməlidirlər. Bu səbəbdən əhaliyə səfərbərlik elan olunarsa hərbi qeydiyyatda olduğu yer üzrə Xidmətin aidiyyəti idarə, şöbə və ya bölməsinə gəlmək tövsiyə edilib.

Könüllü olaraq orduda xidmət etmək istəyən vətəndaşlar Xidmətin www.seferberlik.gov.az saytında aşağıdakı keçid vasitəsilə öz müraciətlərini elektron qaydada həyata keçirə bilərlər:

Qeydiyyat zamanı şəxsiyyəti təsdiq edən sənədin seriya nömrəsi, identifikasiya kodu,  qeydiyyatda olduğu səfərbərlik bölməsi, faktiki yaşayış ünvanı və əlaqə nömrəsini qeyd etmək tələb olunur.

Azərbaycan Respublikası Nazirlər Kabineti yanında Operativ Qərargah tərəfindən koronavirus (COVID-19) pandemiyasının yayılmasının qarşısını almaq və insanların sağlamlıq təhlükəsizliyini təmin etmək məqsədilə müəyyən olunmuş tələblərə əməl edilməsi, respublikamızda və xaricdə yaşayan vətəndaşların rahatlıqlarının, müraciət imkanlarının daha əlçatanlığının, həmçinin çoxsaylı vətəndaş müraciətlərinin qeydiyyatının operativliyinin təmin olunması üçün Səfərbərlik və Hərbi Xidmətə Çağırış üzrə Dövlət Xidməti yeni elektron xidmət istifadəyə verib. 

Qeyd edək ki, zərurət yarandığı halda ehtiyatda olan hərbi vəzifəlilər mövcud qanunvericiliyin tələblərinə əsasən Xidmətin yerli struktur bölmələrinə çağırılaraq ölkənin müdafiəsinin və dövlətin təhlükəsizliyinin təmin edilməsi məqsədilə müvafiq tədbirlərə cəlb edilə bilərlər.