Pandemiya özü ilə həyatımıza çətinliklər gətirsə də, dünyanın hər yerində texnologiyanın daha da inkşaf etməsinə, innovativ həllər axtarışına təkan vermiş oldu. Bir çox inkşaf etmiş ölkələrdə insanların yaxın təmasını azaltmaq üçün səhiyyə və xidmət sahələrinə robotların cəlb edilməsi kimi proseslər xüsusilə diqqət çəkdi. Bəs Azərbaycanda pandemiya zamanı hansı innovativ həllər yarandı və önə çıxdı?

Texnoblogger Tariyel Ağazadə mövzu ilə bağlı TED.az-a münasibətini bildirərkən Azərbaycanda pandemiya zamanı əsas innovativ həllərin biznes sektorda olduğunu vurğuladı: “Bir çox biznes sahələri onlayn platformalara keçməli oldu. Yemək çatdırılma xidmətində restoranların sayı artdı. Daha sonra hər bir mağaza onlayn satış etməyə çalışdı, öz saytını qurdu. Bir növ biznesin rəqəmsallaşması aktual oldu”.

Pandemiyanın təsirlərinə məruz qalan sahələrdən biri də təhsildir. Bəs təhsilimizdə hansı innovativ həllər yarandı?

Təhsil nazirliyi yanında İctimai Şuranın məsul katibi İlqar Orucovun sözlərinə görə pandemiya dövrünün təsiri əslində nə qədər problemlərlə yadda qalsa da, çətinliklər törətsə də, eyni zamanda bir çox məsələləri aktuallaşdırdı: “İlk olaraq məsafədən təhsilin bir təhsil forması olaraq inkişaf etdirilməsini qeyd etməliyik.  Xüsusilə nəzərə alsaq ki, distant təhsil müasir texnologiyaların köməyi ilə həyata keçirilir, ilk olaraq elektron dərsliklər gündəmə gəlir. Burda elektron dərsliklərin hazırlanması, formalaşdırılması məsələsi çox vacibdir”. 

O, həmçinin bildirdi ki, digər vacib nüans təhsil alanlar üçün elektron kitabxanaların yaradılması məsələsidir: “Qeyd etdiyim hər iki məsələ daha çox ali təhsil pilləsi üçün spesifikdir. Bununla bağlı artıq dünyanın distant təhsil modelinin inkişaf etdiyi ölkələrin təcrübəsi mövcuddur. Ümid edirəm ki məhz bu təcrübə qısa müddətdə Azərbaycanda da mənimsənildi, amma yenə də elektron dərsliklər və elektron kitabxanalarla bağlı məsələlər öz həllini tam şəkildə tapmamış oldu. Bu baxımdan da fikirləşirəm ki, pandemiya nəinki təhsil bütün sahələrdə yeni çağırışlar meydana gətirdi.

Məktəblərin internetləşdirilməsi məsələsi gündəmə gətirildi, yeni İKT biliklərinin təhsilə tətbiqi məsələsi aktuallaşdı. Alternativ məsələlər üzərində düşünmək imkanını bizə yaratdı. Ümid edirəm ki bütövlükdə dünyanın təhsil ictimaiyyəti, təhsillə bağlı beynəlxalq qurumlar bu istiqamətdə yeni çağırışlara müvafiq olaraq yeni innovativ düşüncəni ortaya qoyacaqlar”.

Digər vacib məsələ həm orta, həm də ali təhsil bazasında olan məktəblər üçün internet resurslarından istifadə etmək imkanları və məktəblərin İKT təminatı məsələsidir. Bu dövrdə yüksək sürətli internetin təhsil üçün nə qədər önəmli olduğu ortaya gətirildi. Ümid edirəm ki artıq bununla bağlı yeniliklərə biz açıq olmalı, bütün durumlara öz təhsilimizi davamlı etməliyik”, – deyə məsul katib bildirdi.

Günel QURBANOVA