“Azərsu” ASC tərəfindən vətəndaşlara göstərilən müştəri xidmətlərində operativliyin, şəffaflığın və səmərəliliyin təmin edilməsi məqsədilə yeni elektron xidmətlərin yaradılması istiqamətində zəruri tədbirlər davam etdirilir.

ASC-dən TED.az-a bildirilib ki, cari ilin yanvar-mart aylarında vətəndaşlar tərəfindən müxtəlif elektron xidmətlərlə bağlı 173 min müraciət qeydə alınaraq icraya yönləndirilib. Ən çox müraciət “Su borcunun internet vasitəsilə öyrənilməsi”, “Elektron müraciət” və “Elektron faktura” xidmətləri üzrə qeydə alınıb.

Ümumilikdə xidmətlər istifadəyə veriləndən indiyədək vətəndaşlar tərəfindən 1 milyon 847 min müraciət edilib.

Vətəndaşlar “www.e-gov.az” Elektron Hökumət Portalı və “www.azersu.az” saytı vasitəsilə xidmətlərdən yararlana bilərlər.

Elektron xidmətlər vətəndaşların və xidmət təşkilatlarının işini sadələşdirir və asanlaşdırır. Vətəndaşlar bu xidmətlərdən istifadə etməklə əlavə vaxt itkisi və nəqliyyat xərcləri ilə qarşılaşmırlar.

Hazırda “Azərsu” ASC tərəfindən 19 adda elektron xidmət göstərilir. Bunlara su borcunun internet vasitəsilə öyrənilməsi, su borcunun internet vasitəsilə ödənilməsi, abonent məlumatlarının dəyişdirilməsi, istehlakçıların su təchizatı və tullantı sularının axıdılması sisteminə qoşulması üçün texniki şərtlərin alınması, “Su təchizatı və tullantı sularının axıdılması xidmətləri”nə dair abonentə aid məlumatların verilməsi, “Su təchizatı və tullantı sularının axıdılması xidmətləri”ndən istifadəyə görə borcun olmaması haqqında arayış, “Su sayğaclarının təmiri və yaxud nasaz sayğacların dəyişdirilməsi müraciəti”, “Su sayğaclarının plombunun dəyişdirilməsi müraciəti”, “Su təchizatı və tullantı sularının axıdılması sistemində baş vermiş qəzaya dair müraciət” daxildir. Həmçinin qurumun “Elektron müraciət”, “Əhali qrupu üzrə istehlakçılara su təchizatı və tullantı sularının axıdılması xidmətlərinə dair son 12 ay üzrə faktura və ödəniş məlumatlarının verilməsi” elektron xidməti, “Əhali qrupuna aid olan yeni istehlakçının qeydiyyata alınması”, “Əhali qrupu üzrə istehlakçıların sayğac göstəricilərini təqdim etməsi və hesab fakturanın formalaşdırılması”, “Su nümunələrinin yoxlanılmasına dair müraciət”, “Borcun araşdırılması üzrə müraciət”, “Su sayğaclarının quraşdırılması müraciəti”, “Su təchizatı və tullantı sularının idarə olunması xidmətinin müvəqqəti dayandırılması və bərpası müraciəti”, “Abonentə aid ünvan məlumatlarının dəqiqləşdirilməsi”, “Elektron faktura” istifadəyə verilmiş elektron xidmətləri var.