Azərbaycanda üç əsas mobil operator şirkəti var. Bunlar “Azercell”, “Bakcell” və “Nar”dır. Bu üç operatorun xidmətlərindən ümumilikdə təximinən 14 milyona yaxın nömrə üzrə istifadə olunur. “Azercell” və “Bakcell” nömrələrindən istifadə bu rəqəmin əsas hissəsini təşkil etməklə yanaşı, az bir fərqlə “Bakcell”in “Azercell”i izləməsi ilə müşahidə olunur. “Nar” bazara bu iki operatordan sonra daxil olsa da, gərgin rəqabətə rəğmən, elan etdiyi kompaniyalar və güzəştli tariflər nəticəsində öz yerini ala bilib.

Maraqlı bir nüans var... Ölkəmizdə iki, hətta üç nömrəli telefonlar sürətlə artmaqdadır. Belə ki, sərfəsiz tariflər vətəndaşları alternativlərə məcbur edir. “Nar”a “Nar”la, “Azercell”ə “Azercell”lə, “Bakcell”ə isə “Bakcell”lə zəng etmək sərfəlidir. Birindən hamısına zəng etməyi “gözə alanlar” isə internet üçün başqa mobil operatora ehtiyac duyur.

Təbii ki, istisnalar da var. Bu istisnalara daxil olanlar zənginlər və telefondan əsasən zəng qəbul edənlərdi. Yəni bütün hallarda mobil operatorun bahalı danışıq və internet tarifi bu şəxslərin cibinə zərər vurmur.

TED.az-ın sorğusuna cavab olaraq “Azercell” istifadəçisi Güllü Niftalıyeva bildirir ki, telefondan əsasən övladları və qohumları ilə danışmaq üçün istifadə edir: “Mənim övladlarım başqa-başqa yerlərdə yaşayırlar. Özləri hər gün mənə zəng edirlər. Çox nadir halda mən zəng etməli oluram. Amma, onlar da istəyirlər ki, kontur çox getməsin deyə, onlarla eyni nömrədən işlədim. “Sim” işlədən istəyir ki, nömrəm “sim” olsun. “Cin” işlədən də “cin” olmasını istəyir”.

“Nar” istifadəçisi İmran Mustafayev isə nömrəsini bir operatordan digərinə daşıdığını bildirir: “Mənim ilk nömrən “Bakcell” olub. İllərlə həmin nömrəni işlətdim. Hər kəs həmin nömrəmi bilirdi. Lakin, tarif sərf etmirdi. Ona görə də, düşündüm-daşındım nömrəmi dəyişməmək şərti ilə qismən əlverişli variant tapdım. Nömrəmi “Nar”a daşıdım. Hazırda “Turbo” paketindən istifadə edirəm. Danışıq da, internet də əvvəlkinə baxanda sərfəlidir. Demək olar ki, əvvəlki xərcləri yarıya salmışam”.

Əli Zülfiqaroğlu hər üç mobil operatordan istifadə edənlərdəndir: “Mən hər 3 mobil operatordan istifadə edirəm. “Bakcell”in internet paketi çox bahadır, sərf eləmir, eyni zamanda balansdan oğurluq edilir. “Azercell”də müxtəlif kampaniyalar var, müştəriyə alternativlər təklif edir. O baxımdan müsbət məqamları var, amma istənilən halda tariflər çox bahadır. Operatorlardan, adama lazımsız SMS göndərirlər və bunu elə hiyləgərcəsinə edirlər ki, sən nə zamansa özün də bilmədən hansısa proqrama qoşulursan və balansından tutulmalar olur. Ən sərf edəni “Nar”dır. Bütün mobil operatorlara zəng 4 qəpikdir... Amma, istənilən halda xarici ölkələrlə müqayisədə bizim operatorlarmız bahalıdır”.

Aqşin Kərimov “Azercell”i ölkənin əsas brend mobil operatoru sayır və buna görə “Azercell”i seçdiyini deyir: “15 ildən artıqdır ki, “Azercell” istifadə edirəm və “Gənc ol” kompaniyasına qoşulmuşam. “Azercell”i ölkəmizdə bu sahənin 1 nömrəli brendi hesab edirəm. Ona görə də dəyişmirəm. Qiymətlərə gəlincə isə, deyə bilərəm ki, sərfəli deyil. Çox pul yazır. Yaxşı tərəfi şəbəkənin güclü olmasıdır, demək olar ki, hər yerdə tutur”.

Ayna Məmmədova sorğumuzu “Cin sözün əsl mənasında cin kimidir” deyərək cavablandırdı: “İlk nömrəm “Bakcell” olub. Hələ də dəyişməmişəm. Düzdür, zaman-zaman başqa nömrələrim olub, lakin “cin” həmişə öz yerində qalıb. Danışıq qiyməti çox sərfəlidir. İnterneti zəif olsa da sərf edir”.

“Azercell” istifadəçisi Maral Sultanqızı da mobil operatorunun şəbəkə baxımından güclü olduğunu iddia edir: “Azercell”dən 15 ildirki istifadə edirəm. Çünki başqa operatorlardan çox fərqlidir. SMS paketləri, balans imkanları əlavə avantaj verir. Tariflərindən həmişə rahat istifadə edirəm, etibarlı və sərfəlidir. Heç vaxt deməmişəm ki, operatorumu dəyişim... Çünki, buna ehtiyac olmayıb. Şəhərdən kənarlaşan kimi başqa operatorlar zəif olur. “Azercell” isə hər yerdə güclüdür”.

Bildiyimiz kimi mobil operatorlardan təkcə danışıq üçün deyil, həm də internet üçün istifadə olunur. Azərbaycanda ötən il internetin 39%-i kompüter və noutbuk vasitəsilə, 59%-i mobil telefon vasitəsilə, qalan hissəsi isə  planşet və digər cihazlar vasitəsilə istifadə edilib. Son bir ildə kompüter və noutbukda istifadə olunan intetnetin həcmi 15% azalıb, smartfonlarda istifadə olunan internetin həcmi isə 15% artıb. Bu da onu göstərir ki, bahalı mobil operatorlarımız geridə qoyduğumuz il daha zəngin başa vurublar.