Müəllimlərin sertifikatlaşdırılma qaydaları açılanandan sonra onları maraqlandıran bir sıra məqamlar ortaya çıxıb.

TED.az Təhsil İşçilərinin Peşəkar İnkişafı İnstitutunun İnsan resursları mərkəzindən verilən məlumatlara əsasən, sertifikasiyanın müsahibə mərhələsi üzrə əsas məqamlara aydınlıq gətirir:

Müsahibə mərhələsində test imtahanında ən azı 30 bal toplamış şəxslər iştirak edə biləcəklər.

Hər müsahibə iştirakçısına 20 dəqiqə vaxt ayrılacaq. Hər meyar 4 ballıq şkala əsasında qiymətləndiriləcək. Aşağıdakı meyarlar isə bu qaydada hesablanacaq:

- Proqram üzrə mövzunu təqdim etmə bacarığı × 3;

- Təhsilalanları qiymətləndirmə bacarığı × 2;

- Özünü təqdim etmə bacarığı × 2;

- Pedaqoji prosesi təşkil etmə bacarığı × 2;

- Ünsiyyət bacarığı × 2.

Müsahibə mərhələsində maksimal bal 40 olacaq. 20 bal toplamış şəxslər sertifikasiyadan keçmiş hesab olunacaqlar.

Qeyd edək ki, təhsilverənlər beş ildə bir dəfə sertifikatlaşdırmadan keçməlidirlər. Bəzi istisnalar isə var. Sertifikasiya 2 mərhələdən ibarətdir: test (60 sual/bal) və müsahibə (40 bal) mərhələsi. Test mərhələsindən keçid 30, müsahibə mərhələsindən keçid isə 20 bal təşkil edir. Sertifikatlaşdırmadan keçmiş müəllimlər 5 il müddətində təhsil müəssisəsində pedaqoji fəaliyyətlə məşğul ola biləcəklər. 

Üzrlü səbəbdən sertifikasiyada iştirak etməyən və ya keçməyən şəxslər 1 il müddətində iş yeri saxlanılmaqla təkrar sertifikatlaşdırmada iştirak etmək hüququna malik olacaqlar. 

Lamiyə SÜLEYMANLI