ABŞ-ın tanınmış siyasətçilərinin, şirkət rəhbərlərinin və bir çox məşhurların Tvitter hesabını qanunsuz yolla ələ keçirməkdə ittiham olunan 17 yaşlı Qraham İvan Klark və ondan başqa 2 şəxs saxlanılıb.

TED.az xarici mətbuata istinadən xəbər verir ki, ABŞ vətəndaşları Qraham İvan Klark və Nima Fazel, həmçinin İngiltərə vətəndaşı Meyson Şeppard casusluq və şəxsi məlumatların qanunsuz yolla alınıb-satılmasında ittiham olunurlar.

Florida ştatının prokurorluğu 17 yaşlı Qraham İvan Klarkın bu günə qədər 30 ayrı cinayətə görə axtarıldığını bildirib. 

O, elektron fırıldaqçılıq və digər insanların kompüter sistemlərinə icazəsiz giriş etməkdə günahlandırılıb.

Xatırladaq ki, platformaya qarşı tətbiq olunan hücum iyulun ortalarında baş verib. Elon Musk, Bill Gates, Jeff Bezos daxil olmaqla 130 istifadəçinin hesabı sındırılıb.