"Yüksək texniki peşə təhsili səviyyəsi üzrə informasiya texnologiyaları ilə bağlı ixtisasların yaradılmasının İKT sahəsinə müsbət təsiri olacaq". 

Bu sözləri TED.az-a açıqlamasında təhsil eksperti Elçin Əfəndi deyib.

O bildirib ki, bu il İnnovasiyalar Peşə Məktəbində yüksək ixtisas sahiblərinə subbakalavr dərəcəsinin verilməsi nəzərdə tutulub: "İnformasiya texnologiyaları ilə bağlı belə qərarın verilməsi peşə təhsili mərkəzlərinə müraciətlərin çoxluğuna gətirib çıxaracaq. Eyni zamanda təhsilalanların təcrübələrinin artması və peşəkar şəxs kimi formalaşmalarına təkan verəcək. Qeyd edim ki, indiyə qədər peşə məktəbini bitirənlərə subbalakavr dərəcəsi verilmirdi. Bundan sonra subbakalavr dərəcəsi veriləcəyinə görə, peşə məktəbi məzunlarının ali təhsil müəssisələrinə imtahansız qəbul imkanı da yaranacaq".

Elçin Əfəndi, həmçinin bunun İKT sahəsinə də müsbət təsir göstərəcəyini qeyd edib: "Bu vaxta qədər həmin ixtisas ali təhsil səviyyəsində öyrədilirdisə, artıq peşə məktəbində öyrədiləcək. Az da olsa, İKT sahəsi üzrə təcrübəli şəxslər formalaşdırmaq mümkün olacaq. Həmçinin şirkətlər Peşə Təhsili üzrə Dövlət Agentliyinə müraciət etdikdə rahatlıqla həmin sahə üzrə kadrlarla təmin oluna biləcəklər".

Günel QURBANOVA